Сәрсенбі, 24 тамыз күні ШҚО әкімдігінде облыс басшысы Даниал Ахметовтің төрағалығымен жиын өтті. Күн тәртібінде білім беру мекемелерінің жаңа оқу жылына дайындығы пысықталды: оқушыларды оқулықтармен, көп балалы және аз қамтылған отбасылардағы оқушыларды мектеп формасымен, аяқ киіммен, оқу құралдарымен қамтамасыз ету, білім нысандарындағы ағымдағы және күрделі жөндеу жұмыстарының барысы, балаларды мектепке дейінгі біліммен қамту және жылыту маусымына дайындық жайы сөз болды.
Биыл облыста жоғары оқу орындары мен колледждерде мамандарды оқыту үшін 450 грант бөлінді. Алғаш рет ветеринария мамандығына гранттар бөлінді. ШҚО басшысының айтуынша, бұл өте маңызды, өйткені дәл осы мамандыққа үлкен сұраныс бар. Бүгінгі таңда ШҚО-да 342 білім беру мекемесі бар, онда жаңа оқу жылында 95 мың оқушы білім алатын болады. Шығыс Қазақстанның барлық мектептері 5 күндік оқу аптасына көшеді. «Біз көп балалы және аз қамтылған отбасылардың барлық оқушыларын мектеп формасымен, аяқ киіммен және тегін жол жүрумен қамтамасыз еттік. 27 тамызға дейін барлық мектептер оқулықтармен қамтамасыз етіледі, бүгінде біз оқу құралдарының 80 пайызын сатып алдық»,- деп жазды Даниал Ахметов инстаграм әлеуметтік желісіндегі жеке парақшасында. Мектептерде ағымдағы және күрделі жөндеу жұмыстары аяқталды. Облыста апатты жағдайдағы мектептер мен үш ауысымды мектептер жоқ. Ел Президентінің тапсырмасы бойынша, өңірде 7 жаңа мектеп салынып жатыр. Олардың бірі осы оқу жылында Риддер қаласында пайдалануға беріледі. Сондай-ақ Күршім ауданындағы Жолнұсқау кентінде және Ұрынхай ауылында 2 жаңа мектеп пайдалануға беріледі. Ұрынхайдағы мектеп 1 қазанда ашылады, оған дейін оқушылар ескі мектепте оқитын болады. Қазіргі күні Шығыс кентіндегі №33 мектепте күрделі жөндеу жұмыстары басталды. Екі айдың ішінде аяқтау жоспарланып отыр. «Ескі мектепте қазан айына дейін Шығыс кентіндегі бастауыш сынып оқушылары оқуға мәжбүр болады. 10 жылдан астам уақыт бұрын салынған мектепте жарықтар пайда болды және мердігерлердің келіспеушіліктеріне байланысты жөндеу жұмыстары ұзаққа созылды. Аға буын балаларды уақытша күн сайын әкетіп, көрші Ахмер кентіндегі мектептен алып кететін болады»,- дейді ШҚО басшысы. Қатты отынмен жылытылатын барлық мектептер көмірмен толықтай қамтамасыз етілген. «Балаларды мектепке дейінгі біліммен қамту бойынша айтатын болсақ, 3 жастан 6 жасқа дейін – 100 пайыз, 2 жастан 6 жасқа дейін 97,7 пайызды құрайды. Өскемен қаласында 4 балабақша пайдалануға беріледі. Мемлекеттік-жеке әріптестік бағдарламасы бойынша Аблакетка ықшам ауданында 140 орындық балабақша ашылады. 2023 жылы тағы 4 балабақша және инвесторлар есебінен тағы 5 балабақша пайдалануға беріледі. Осылайша, келесі жылы 2 жастан 6 жасқа дейінгі балаларды мектепке дейінгі біліммен қамту 100 пайыз ды құрайды»,- деп жазды Даниал Ахметов.
Талшын ҚАЛИАСҚАР,
«Семей таңы»
