1995 жылдың 30 тамызы — Қазақстан Республикасының Конституциясы қабылданып, ел тарихына алтын әріппен жазылған күн. Ата Заңымыз азаматтардың құқықтары мен бостандықтарын қамтамасыз ете отырып, өздерінің мемлекеттің сенімді қорғауында екенін терең сезулеріне үлкен мүмкіндік берді.
Еліміздегі ынтымақ пен бірлікті, татулықты нығайту үшін әрқайсымыз Ата Заңымызды құрметтеп, онда белгіленген талаптар мен құндылықтарды ұстануға тиіспіз. Бұл біздің абыройлы борышымыз болуы керек. Сол арқылы еліміздің тұрақты дамуына, қоғамдық келісімге, бейбітшілік пен тыныштыққа қол жеткізе аламыз.
Ата Заң мемлекетімізде жүзеге асырылып барлық саяси-экономикалық, әлеуметтік реформалардың ілгері басуына, дамудың қайнар бастауына айналды.
Халқымыз ел Президенті, ҚХА Төрағасы Қасым-Жомарт Кемелұлы Тоқаевтың Жаңа Қазақстан құруға бағытталған реформаларын, Конституцияға енгізілген өзгерістерді қабылдау арқылы жаңа дәуірге қадам басты.
Ата Заңымызда: «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырды, оның ең қымбат қазынасы – адам және адамның өмірі, құқықтары мен бостандықтары» деп көрсетілген.
Мемлекеттік биліктің бірден-бір бастауы – халық.
Конституция күні — тәуелсіз Қазақстанның ең басты мемлекеттік мерекелерінің бірі. Ендеше, Ата Заңымыз мәңгілік мақтанышымызға айналсын!
Орал ШӘРІПБАЕВ,
Халықаралық «Қазақ тілі» қоғамының вице-президенті, Қазақстан халқы Ассамблеясының мүшесі, қоғамдық медиатор
