Жыл сайын 29 тамызда бүкіл әлем Халықаралық ядролық сынақтарға қарсы іс-қимыл күнін атап өтеді. Дәл осы күні осыдан 31 жыл бұрын Семей ядролық полигонын жабу туралы маңызды шешім қабылданды. Бұл күн — жарылыстарды басынан өткізген Семей өңірі тұрғындары үшін ерекше күн. Жыл сайын 29 тамыз күні қаладағы Бейбітшілік аралында Бейбітшілік акциясы өтеді.
Бұл акция биыл да жалғасын тауып, семейліктер мен қала қонақтары аралдағы «Өлімнен де күшті» монументіне гүл шоқтарын қойып, ядролық полигонның құрбандарын бір минут үнсіздікпен еске алды. Гүл шоқтарын қою рәсіміне облыс басшылығы, зиялы қауым өкілдері қатысты.
Әлем халқын бейбітшілікке үндейтін маңызды шарада жарты ғасырдан астам уақыт өткізіліп келген ядролық жарылыстардың толыққанды тоқтатылып, Семей полигонының жабылуы тарихи шешім болғаны, бұл теңдессіз қадам семейліктердің ғана емес, бүкіл қазақстандықтардың, дүние жүзіндегі бейбітсүйгіш елдердің қолдауына ие болғаны жайлы айтылды.
Тарихи деректерге жүгінсек, осы уақытқа дейін бүкіл әлемде жасалған барлық сынақтардың 24 пайызы Қазақстан аумағында орын алды. 40 жылдың ішінде республика аумағында 456 жер асты және жер үсті сынағы жасалды. Олардың жалпы қуаты 1945 жылы Хиросимаға тасталған бомбаның қуатынан 2,5 есеге асып түседі.
Қазақстан ядролық қарудан өз еркімен бас тарта отырып, бүкіл әлемге бейбітсүйгіш ел ретінде танылды.
Дана ТАЛҒАТБЕК,
«Семей таңы»