«Шығыс» өңірлік қолбасшылығы әскери қызметшілерінің отбасы мүшелерімен жұмысты ұйымдастыру қызметі Семей полигонының жабылу күні қарсаңында облыстық өлкетану музейінде «Ядролық қарусыз әлем – бейбіт әлем» атты шара ұйымдастырды. Шараға әскери қызметшілердің балалары шақырылды. Тағылымды кештің мақсаты балалардың өз қалаларының тарихы туралы білімдерін жетілдіріп, ядролық сынақтар және олардың зардаптары жайында жан-жақты ақпарат беру.
– Біз Семей өңірінде толассыз жүргізілген ядролық сынақтардың салдары және оның қоршаған ортаға тигізген зардабы жайында тереңнен сөз қозғаудамыз. Бүгінгі шараға полигон тақырыбында қалам тербеген жергілікті ардагер журналистерді шақырдық. Оқушылар көкейлерінде жүрген сауалдарын қойып, өздеріне қажетті ақпаратты ала алды. Біз әскери қызметшілердің балаларының еліне деген сүйіспеншілік сезімін арттыра отырып, оларды табиғат құндылықтарын қорғауға тәрбиелейміз, — дейді «Шығыс» өңірлік қолбасшылығы әскерлері тәрбие және идеология жұмыстары басқармасының офицері майор Аслан Тағаев.
Мұражайға саяхатқа келген оқушыларға мамандар халқымызға, соның ішінде Семей өңірі тұрғындарына үлкен қайғы-қасірет әкелген ядролық жарылыстар жайында әңгімелеп берді. Балалардың назарына Қазақстанның жаппай қырып-жою қаруын таратпау және осы мақсаттағы жаһандық үдеріске белсенді атсалысу бағытындағы саясаты мен ядролық қаруды таратпау саласындағы халықаралық деңгейдегі бастамалары жайында бейнефильм ұсынылды.
Әскери қызметшілердің балалары музейдегі тәлімі мол іс-шарадан кейін Бейбітшілік аралындағы ядролық сынақтың құрбандарына арналған монументке барып, сынақ құрбандарының рухына тағзым етті. Шара қонақтарының бірі Назира Талғатқызының әкесі «Шығыс» өңірлік қолбасшылығында қызмет етеді. Балғын қыз полигон зардабынан туындаған жан шошырлық көріністердің әлі де өзекті екендігіне тоқталды. «Бүгінгі танымдық шарада қатарластарым да полигон зардабы жайында көп ақпарат алды деп ойлаймын»,- дейді ол. Назира монумент алдында полигон тақырыбына арналған өлеңін мәнерлеп оқып, қалың көрерменнің қошеметіне бөленді.
Шара соңында балалар бейбіт әлемнің тұрғыны ретінде әуеге ақ шарлар ұшырып, фотосуретке түсті.
Абай өңірлік гарнизонының баспасөз қызметі
