Мемлекеттік қызмет істері агенттігінің қолдауымен республика көлемінде «Үздік ауыл әкімі» байқауы өткізіліп келеді. Конкурсқа қатысушы алдағы 3 жылға ауылдық округті дамытуға арналған жобалық жұмыстарын және өзінің әкімшілік аумағының әлеуметтік-экономикалық даму көрсеткіштері туралы ақпарат ұсынады.
Аталған конкурстың мақсаты — жұмыста жоғары нәтижелерге қол жеткізген, ауылдық елді мекендердің дамуына елеулі үлес қосып отырған үздік ауыл әкімдерін анықтау және көтермелеу.
Конкурстық іріктеу қорытындысы бойынша Абай облысынан аймақтық комиссияның шешімімен Аягөз ауданы Малкелді ауылдық округінің әкімі Мақсат Ғылымбекұлы Исаханов (2020 жылғы қаңтардан бастап әкім) ең үздік ауыл әкімі ретінде танылды, ол алдағы уақытта байқаудың республикалық кезеңіне қатысады.
Мақсат Ғылымбекұлы 1988 жылы бұрынғы Семей облысы Шұбартау ауданы Баршатас ауылында дүниеге келген. Шәкәрім атындағы Семей мемлекеттік университетінің «Құқықтану» мамандығы бойынша жоғары білімі бар. Үйленген, төрт баланың әкесі.
Еңбек жолын Аягөз қаласының Халыққа қызмет көрсету орталығының инспекторы болып бастаған. 2013-2015 жылдар аралығында Малкелді ауылдық округі әкімі аппаратында іс жүргізуші, 2017 жылдан бастап аталған ауылдық округ әкімі аппаратының бас маманы болып қызмет атқарды.
Бұл жоба «Рухани жаңғыру» бағдарламасын ұлттық жаңғыру кезеңіне көшіру жөніндегі 2022-2024 жылдарға арналған жол картасы шеңберінде іске асырылуда.
