Семей қаласының арнаулы әлеуметтік қызметтер көрсету орталығында «Ерекше» балалардың мектепке барар жолы» атты дәстүрлі мерекелік шара ұйымдастырылды. Қызмет алушыларды әлеуметтендіру және қоғамға кіріктіру, мерекелік көңіл-күй сыйлау, балалардың бір-бірімен қарым-қатынас жасау дағдыларын қалыптастырып, тіл табысуға тәрбиелеу мақсатын көздейтін дәстүрлі іс-шараға Абай облысы әкімдігінің өкілдері, облыстық мәслихат хатшысы Қуаныш Сүлейменов, Семей қаласы әкімінің орынбасары Айдар Садырбаев, облыстық жұмыспен қамтуды үйлестіру және әлеуметтік бағдарламалар басқармасының басшысы Айнұр Сұлтанова, Жұмыспен қамту, әлеуметтік бағдарламалар және АХАТ бөлімі басшысының міндетін атқарушы Замира Мутафина қатысты.
Дана ТАЛҒАТБЕК,
«Семей таңы»
— «Ерекше» балалардың мектепке барар жолы» іс-шарасында 1-сыныпты үйден оқуға жолдама алған балалар мен 9-сыныпты бітіріп, қала колледждеріне оқуға түскен түлектермен бірге Білім күнін атап өтудеміз. Әрине, әлеуметтік орталықта қызмет алатын балаларға мектеп бағдарламасын да қатар алып жүру қиынға соғады. Сондықтан олардың мектеп пен колледждерде оқуға ұмтылысы — біз үшін үлкен қуаныш, бұл еңбегіміздің нәтижесі деп білеміз. Біздің орталыққа диагноздары ауыр, психоневрологиялық ауытқулары бар балалар келеді. Мектеп бағдарламасын меңгеру ерекше балаларға қиындық тудырғанымен, дұрыс оңалту жұмыстары жүргізілсе, олардың да мектеп табалдырығын аттай алатындарын дәлелдеп отырмыз. Бүгінгі мерекелік шара өзімізде қызмет алушылардың күшімен өтуде, — дейді қалалық арнаулы әлеуметтік қызметтер көрсету орталығының директоры Рымхан Тынысова.
— Құрметті ата-аналар, орталық ұжымы, қадірлі іні-қарындастарым! Мерекелік сәттің үстінде қауышып отырғанымызға қуаныштымын. Тағдыр басқа сынақ салғанымен, балаларының қатарынан қалмай, топ ішінде жүргенін қалайтын ата-аналар, бүгін үміттеріңіз ақталып отыр деп ойлаймын. Балалардың қадамдары сәтті болсын! – деп тілегін білдірді Айдар Серікқазыұлы.
Іс-шарада бірінші сыныпты үйден оқуға жолдама алған және қала колледждеріне түскен түлектер әлеуметтік қызметкерлермен бірге салтанатты түрде ортаға шақырылып, өз өнерлерін көрсетті. Мерекеде орталықтың мақтаныштары – қалалық, облыстық байқауларда ғана емес, республикалық жарыстарда да жеңімпаз атанып жүрген спортшылар – «Спешиал Олимпикс» олимпиада қозғалысының белсенді қатысушылары, футболшылар командасы, теннисшілер құрамасы, тоғызқұмалақ, дойбы, шахмат ойындарының қалалық, облыстық чемпионатының жеңімпаздары, сондай-ақ 2019 жылы Біріккен Араб Эмиратының Абу-Даби қаласында өткен Дүниежүзілік жазғы арнайы олимпиада ойындарында жеңіл атлетикадан қола медаль иеленген балаларға да құрмет көрсетілді.
Мерекеде орталық қызметкерлері ұйымдастырған «Екі жұлдыз» шығармашылық фестивалінің жеңімпаздары, күндізгі бөлімшеде қызмет алатын балалар өз өнерлерімен қонақтарды тәнті етті.
Шара барысында қаланың жеке кәсіпкерлерінің демеушілігімен сыйлықтар — көп балалы және аз қамтылған отбасыларда тәрбиеленіп жатқан 1-сыныпқа баратын балаларға мектеп формасы мен оқу құралдары, ал түлектерге ұялы телефондар табыс етілді.
Мерекелік іс-шараның соңында алғашқы қоңырау соғылып, әуеге шарлар ұшырылды.
