Бүгінгі күні елімізде ескі, апатты жағдайда тұрған мектептер аз емес. Осыған орай Мемлекет басшысы Қасым-Жомарт Тоқаевтың өткен жылғы Жолдауында 2025 жылға қарай жаңадан мың мектеп салу туралы тапсырма берген болатын. Әсіресе ауылдарда толық кешенді білім ошақтары болуы тиіс. Бүгінде еліміздің әр өңірінде Президенттің осы тапсырмасы аясында жаңа мектептер бойы көтеруде. Соның бірі — Ұлан ауданындағы Қасым Қайсенов кентінде салынып жатқан мектеп. Ұлан ауданының әкімі Ренат Құрмамбаев жуырда мектеп құрылысының барысын бақылау мақсатында кентке жұмыс сапарымен барып қайтты.
«Әріптестерімізбен бірге ауданымыздағы жаңа нысандардың құрылыс барысы мен қарқынын тексердік. Қ.Қайсенов кентінде 320 орындық мектеп салынуда. Құрылыс барысы мен қарқыны қанағаттанарлық, мердігер ұйым жақсы жұмыс істеуде, келесі жылы біздің балаларымыз жаңа мектепте оқитын болады», — деп жазды бұл орайда әлеуметтік желідегі жеке парақшасында Ұлан ауданының әкімі Ренат Құрмамбаев.
Қасым Қайсенов кентінен соң өңір басшысы Айыртау, Бозанбай ауылындарына ат басын бұрды. Айыртау ауылында дене шынықтыру-сауықтыру кешенінің құрылысы жүріп жатыр.
Аудан басшысының айтуынша, Айыртауда құрылыс жұмыстары бекітілген кестеге сәйкес жүргізілуде. Мердігер компания нысанды уақытында аяқтауы тиіс.
Ал Бозанбай ауылындағы мердігер мекеменің жұмысына аудан әкімінің көңілі толмады, Мұндағы жұмыс қарқыны баяу, мердігер жоспарланған мерзімнен кешігіп жатыр. Өңір басшысы компания басшыларына ескерту жасап, құрылысты уақытында аяқтауды міндеттеді.
Дәл осындай жағдай Ұлан ауданының Таврия ауылдық округінде орын алған, аудан әкімшілігі мердігер компания өкілдеріне нысанды межеленген уақытында тапсыру керектігін ескертіп, барлық нысандардың құрылыс барысы аудандық әкімшіліктің тұрақты бақылауында болатынын жеткізді.
Бибі ТӨЛЕГЕНҚЫЗЫ,
«Семей таңы»
