Мемлекет басшысының Жарлығына сәйкес, барлық деңгейдегі әкімдер жыл бойы халықпен кездесулер өткізуге тиіс, олардың барысында халықты толғандыратын әлеуметтік мәселелерге баса назар аудара отырып, проблемалық сұрақтарды шешудің жолдары мен мерзімдерін түсіндіру қажет.
Осыған орай, барлық аудан әкімдері әр ауылда, кентте, ауылдық округте, аудандық маңызы бар қалада тұрғындармен жиі кездесулер өткізуде. Сондай жиындардың бірі Глубокое ауданының Березовка ауылы мен Верхнеберезовский кентінде өтті. Аудан әкімі Эльдар Тумашинов өңірде атқарылған жұмыстар мен алдағы уақытта жүзеге асырылуы жоспарланған жобалар туралы баяндады.
Жиын барысында сондай-ақ тұрғындардың өтініш-тілектері тыңдалып, сұрақтарына жауаптар берілді.
Кездесу алдында аудан басшысы қазіргі күні жөндеу жүргізіліп жатқан Березовка ауылдық мәдениет үйінде болып, жұмыс сапасын тексерді. Эльдар Лұқбекұлы жергілікті орта мектепке де бас сұғып, білім ошағының жаңа оқу жылына дайындығын көрді. Балалар ойын алаңын да қарап шығып, бірқатар ескертулер айтты.
Верхнеберезовский кентіндегі кездесуде жайылымдық жерлерді қайтару мәселесі де сөз болды.
Аудан әкімі Эльдар Тумашинов Предгорное — Верхнеберезовский автожолындағы жөндеу жұмыстарының сапасын тексеріп, жанұялық-дәрігерлік амбулаторияны, Аллейская көшесіндегі балалар ойын алаңын көріп шықты.
Аудан басшысы шешімін күткен бірқатар мәселелерді өз бақылауына алатынын жеткізді.
Азамат ЕРСАЙЫН,
«Семей таңы»
