КЕШКІ ЖАҢАЛЫҚТАР | 07.09.2022
ДАЛА ӨРТІ КӨБЕЙДІ
Абай облыстық төтенше жағдайлар департаментінде аймақтағы өрт қаупі жағдайына арналған баспасөз мәслихаты болып өтті. Аталмыш кездесуді департамент басшысы Манарбек Шапағатов алғысөзбен ашып, өз сөзінде облысымыздың көптеген аудандарында құрғақшылыққа байланысты орман мен дала өрттерінің қаупі артқандығы жайлы мәлімдеді.
ЖАҢА ӘКІМ ЖҰМЫСЫНА КІРІСТІ
Жарма ауданының жаңадан тағайындалған әкімі Жарқынбек Байсабыров жұмыс сапарын аудан орталығы — Қалбатау ауылының тыныс-тіршілігімен танысудан бастады. Ол сапар барысында елді мекенді дамыту мен абаттандыру, инфрақұрылымдық жабдықтау мәселелеріне баса көңіл бөлінді. Көше жолдарын жөндеу, қоқыс шығару бойынша қызмет көрсететін жеке кәсіпкердің жұмысын жетілдіру, контейнер орындарын бекіту, көше шамдарын жаңарту мәселелері бойынша Жарма ауылының әкіміне тапсырмалар берілді. Сондай-ақ ағаштарды кесіп, шағын саябақтарды қалыпқа келтіру, инфрақұрылым нысандарының эстетикалық келбетін жақсарту, сенбілік өткізу сынды іс-шаралар да назардан тыс қалмады.
ЖОБАЛАР САПАЛЫ ОРЫНДАЛУЫ ТИІС
Бородулиха ауданының әкімдігінде кеңейтілген аппарат отырысы өтті. Ауылдық округтердің әкімдері мен дербес бөлім басшылары қатысқан жиында өңір басшысы алдағы уақытта атқарылатын жұмыстар мен іске асырылып жатқан жобалардың уақытылы әрі сапалы орындалуы қажеттігін айтты. Сондай-ақ аудан аумағында келесі жылға жоспарланған жобалардың жобалық-сметалық құжаттамаларын даярлау, қажетті есептеулерді жүргізу, ойға алған істерді бекіту мәселелерін пысықтады.
МЕРЕЙТОЙҒА ДАЙЫНДЫҚ ҚАЛАЙ?
Бүгін Абай аудан әкімі Нұржан Оразбекұлы жұмыс кестесіне сәйкес, М.Әуезовтің 125 жылдық мерейтойына байланысты Қарауыл ауылында іс-шаралар өтетін орындарды аралады. Өңір басшысы атқарылып жатқан жұмыстарға байланысты бірқатар тапсырма беріп, оларды сапалы жүзеге асыруды жауапты сала басшыларына жүктеді. Сонымен қатар, заңғар жазушының мерейтойына байланысты аудан басшысының нұсқауымен аудан орталығында орналасқан М.Әуезов саябағына абаттандыру және жөндеу жұмыстары жүгізілді.
