Абай облысы Бесқарағай ауданы Бесқарағай ауылында тұратын Рүстемовтер отбасы Канонер филиалына қарасты Жұмыр орманшылығында тұтанған өрттің алдын алып, оның таралуына жол бермеді, — деп хабарлайды semeytany.kz ақпараттық порталы glpr.semeyormany сілтеме беріп.
6 қыркүйек күні кешкі сағат 19:00 кезінде Жанболат Рүстемов отбасымен бірге жекеменшік көлігімен жол жүріп келе жатқанда үлкен жолдан қашық емес жерден шыққан түтінді байқайды. Бірден көлігін тоқтатып, жүгіре жеткен отбасы мүшелері жедел тиісті орындарға телефон шалып, өздері отты сөндіруге кірісіп кетеді. Көліктің ішіне төселген төсеніштерге құм салып тасыған олар жанталаса дала өртін сөндіруге әрекет етті. Канонер филиалының орман өртін сөндіру стансасы мамандары келіп жеткенге дейін Жанболат Рүстемов, зайыбы Анаргүл Рүстемова және ұлдары Есхан Рүстемов үшеуі өртті сөндіріп үлгерген болатын.
Далада тұтанған отты көрген кезде немқұрайдылық танытып өтіп кетпей, орман ағаштарын өрттің жалмауына жол бермеген Рүстемовтер отбасының әрекеті баршаға үлгі етуге тұрарлық. Рүстемовтер отбасына барша «Семей орманы» резерватының қызметкерлері алғыстарын білдіреді.
Посмотреть эту публикацию в Instagram
