Бұл салада оң динамика бар ма?
Бүгінгі таңда ШҚО-да цифрландыруды дамыту бағытындағы жұмыстар қарқынды түрде жүруде. Атап айтар болсақ, ағымдағы жылдың соңына дейін 116, ал келесі жылы 49, 2024 жылы 17 ауылда ғаламтор желісі болмақ.
Президент тапсырмасы аясындағы бұл жұмыстар облыс әкімі Даниал Ахметовтың назарға алуымен кезең-кезең бойынша нәтижелі түрде атқарылып жатыр. Мәселен, ШҚО Цифрландыру және архивтер басқармасы берген мәліметтерге сүйенсек, атқарылған жұмыстарға жүргізілген талдау қорытындылары бойынша, операторлар өткен 2021 жылы 68 ауылдық елді мекеннің тек 27-де интернет желісінің жылдамдығын арттырған. Бұл орайда ұялы байланыс операторлары сапасыз қызмет көрсеткені үшін 10 миллион теңгеге жуық айыппұл төлеген екен.
Міне, осы көрсеткіштерді ескере отырып, ШҚО әкімі Даниал Кенжетайұлының арнайы өкімімен интернет желісі сапасының мониторингі бойынша арнайы жұмыс тобы бекітілген болатын. Құрамына қоғамдық ұйымдар мен операторлардың өкілдері кіретін осы топты тексеру қорытындылары бойынша актілер жасалып, ол телекоммуникациялар комитетіне байланыс операторларына тиісті шаралар қабылдау үшін жіберілді.
Аталған бағыттағы жұмыстар әсіресе, өткен жаз айларында қарқынды түрде жүргізілді. Сонымен қатар, биыл 41 антенналық-мачталық құрылысы бойынша жұмыстар жүргізілуде. Осыған дейін жер телімдері бөлінген болатын, құрылысқа қажетті жобалау сметалық құжатты әзірлеу бойынша жұмыстар аяқталып қалды.
Бұл ретте тоқтала кетер бір жайт, бүгінде облыста халқының саны 250 адамнан кем 103 ауылдық елді мекен мобильді интернетпен қамтамасыз етілмеген және байланыс сапасын жақсарту жөніндегі бағдарламаға кірмеген. Қазіргі таңда бұл бағыттағы олқылықтардың орны толтырылуда.
«Востоктелеком» ЖШС-нің цифрлық даму министрлігі алдындағы лицензиялық міндеттемелер шеңберінде 103 елді мекеннің 45-і ғаламтормен қамтамасыз етіледі. Қалған 58 елді мекен бойынша ұсыныстар үшін Цифрлық даму, инновациялар және аэроғарыш өнеркәсібі министрлігіне және байланыс операторларына хаттар жолданды.
Интернет желісінің сапасын бақылауды жүзеге асыру үшін ғаламтор желісінің сапасын мониторингілеу кейсі әзірленді. Жауапты мамандар ай сайын Speed test мобильді қосымшасының көмегімен ғаламтор желісінің жылдамдығын өлшейді, бұл деректер әзірленген сервиске енгізіледі және «жылу» картасында көрнекі түрде көрсетіледі.
Жалпы, соңғы айлардағы көрсеткіштерге сүйенер болсақ, облыстың экономикалық даму салаларын цифрландыру бойынша оң динамика байқалады.
Еліміздің Цифрлық даму, инновациялар және аэроғарыш өнеркәсібі министрлігінің есептеу әдістемесіне сәйкес, «ақылды» қалалар бастамаларын іске асыру және негізгі көрсеткіштерге қол жеткізу критерийі бойынша Шығыс Қазақстан облысы әкімдігінің қорытынды бағасы өткен жылы 18,4 балды (ықтимал 20 балдан) құрады. Бұл 2020 жылғы кезеңнен 3,2 балға (15,2) жоғары, 2019 жылғы көрсеткіштен 2 есе жоғары.
Сондай-ақ Қазақстан Республикасы Цифрлық даму, инновациялар және аэроғарыш өнеркәсібі министрлігіне ұялы операторлардың міндеттемелерінен тыс қалған 250-ден астамм халқы бар 68 елді мекеннің байланыс сапасын жақсартуға өтініш жіберілді. Аталған бағыттағы жұмыстар алдын ала бекітілген жұмыстарға сай жүргізіліп жатыр.
Әлібек КЕМЕЛХАН,
«Семей таңы».
