Апта ішінде Абай облысының әкімі Нұрлан Ұранхаев Жапонияның Қазақстан Республикасындағы Төтенше және өкілетті Елшісі Джун Ямадамен, сонда-ақ күншығыс елінің бірқатар ғалымдарымен кездесті.
Облыстық әкімдік ғимаратында өткен кездесу барысында қос тарап өзара пікір алмасып, бірқатар өзекті мәселені ортаға салды. Алдағы уақытта жапон елі жаңадан құрылған аймақпен берік әріптестік байланыс орнатпақ. Мәселен, кездесу барысында қазіргі Абай облысы аумағында қайтыс болған жапондық интерн-тұтқындар жерленген аумақтарды зерттеу жұмыстарын жүргізу мәселесі кеңінен талқыланды.
Аймақ басшысы Нұрлан Тельманұлы сонымен қатар, екі ел арасындағы әлеуметтік, білім, денсаулық сақтау және Семей ядролық полигонындағы сынақтардан зардап шеккен халықты оңалту салаларындағы ұзақ және жемісті ынтымақтастықты ерекше атап өтіп, өзара тиімді қарым-қатынастардың жалғасатынына сенім білдірді. Бұл орайда жапондықтар халықаралық деңгейде мемлекетіміздің бастамашылығымен қолға алынған «Ядролық қарусыз әлем» идеясына да қолдау білдірді.
Жалпы, облысымызбен соның ішінде, тікелей Семей қаласымен Жапония үкіметі арасында бұрыннан жақсы жолға қойылған әріптестік байланыс бар. Мәселен, 22 тамызда Семей медицина университетіне Жапония ғалымдары жұмыс сапарымен келіп, екіжақты ынтымақтастықтың мүмкіндіктерін талқылап, әріптестік байланысты кеңейтуге, Семей ядролық сынақ полигонында зерттеу жүргізіп, зардап шеккен халықты оңалтуға қол ұшын созуға ықылас-ниет танытты.
Ал бұл сапарда Жапония мемлекетінің делегациясы өздеріне көрсетілген құрметке ризашылығын білдіріп, алдағы уақытта да бірлесіп жұмыс атқаруға дайын екенін білдірді.
«СТ» — ақпарат
