Президент өзінің Жолдауын экономикалық блоктан бастады. Негізінде, барлық мәселе бұрыннан таныс, бірақ өкінішке қарай, шешімі табылмай келеді. Президент бірінші кезекте, жаңа Салық кодексі туралы жариялады. Сондай-ақ ең төменгі жалақыны 70 000 теңгеге дейін арттыру туралы мәлімдеді.
Әлеуметтік мәселелерге келетін болсақ, бала күтімі бойынша төлемдер сәби 1,5 жасқа толғанға берілетін болды. Бұл өзгерістер 2023 жылдың қаңтарынан бастап күшіне енеді. Сондай-ақ, Ұлттық қор кірістерінің 50%-ы 18 жасқа дейін арнайы шоттарға аударылады. Аталған өзгерістер 2024 жылдан бастап күшіне енеді. Бұл туралы бұған дейін де айтылса да, Қазақстанда мұндай өзгерістер алғаш рет орын алып отыр. Мен аталған өзгерістерді құптаймын, себеб бала 18 жасқа келіп, ересек өмірге қадам басқанда белгілі бір сома жиналып, оның тұрғын үйге, оқу орнына және т. б. Қажеттіліктері үшін бастапқы капиталы болады.
Президент әйелдердің зейнеткерлік жасына қатысты да өзгерістер енгізді. Яғни, зейнеткерлік жас 61 жасқа дейін қысқарды. Бірақ мен бұл жеткіліксіз деп санаймын. Әйелдер зейнетке ерте шығуы тиіс. Менің ойымша, әйелдердің зейнеткерлік жасын кемінде тағы үш жылға, яғни 58 жасқа дейін төмендету қажет. Көп балалы аналардың зейнеткерлік жасын 55 жасқа дейін, ал полигон аймағында тұрған, полигон куәлігі бар әйелдердің жасын 50 жасқа дейін қысқартқан жөн деп ойлаймын.
Ауыл шаруашылығы туралы көп дүние айтылды. Қазіргі уақытта аталған салада жаңа технологиялар, жаңа бағдарламалар жоқ. Оның бәрін дамыту қажет, өйткені бұл еліміздің азық-түлік қауіпсіздігі мен бағаға, басқа да түйткілді мәселелерге тікелей әсер етеді.
Серік БАЙҒАЛИЕВ,
Абай облыстық мәслихатының депутаты