Парламент палаталарының бірлескен отырысында Ел Президенті Қасым-Жомарт Тоқаев өзінің кезекті Қазақстан халқына Жолдауын жариялады.
Отырысты тікелей эфирде тамашалаған біз Президент жолдауын әдеттегідей қуана қабылдадық. Президент ел көкейінде жүрген түйткілді сұрақтарға нақты жауаптар беріп, таяу келешектегі Қазақстан дамуының бағыт-бағдарын айқындап берді.
Ел дамуын алға сүйрер экономикалық саясат бірінші кезекте халықтың әл-ауқатын арттыруға бағытталуы тиіс екендігін баса айтты. Салық саясатын реттеу, шағын және орта бизнесті қолдаудың жаңа механизмдерін жолға қою, монополиялық нарықтарды қадағалау, бюджеттік саясатты қайта қарау туралы тапсырмалары — Президенттің ел экономикасын бүге шігесіне дейін білетіндігін тағы бір дәлелдеді.
Әдеттегідей Президент білім беру саласына да ерекше көңіл бөлді. Мәселен, жоғары білім беру саласын жетілдіру бағыттарының бірі – білім беру гранттарын бөлудің жаңа жүйесін енгізу. Ендігі кезекте, мемлекеттік тапсырыс, яғни білім беру гранттары талапкерлерге ҰБТ-дан алған нәтижесіне қарай, дифференциалды деңгейде берілмек. Грант мөлшері жинаған нәтижесіне сәйкес, 30%-дан 100%-ға дейінгі мөлшерді құрайды. Бұл өз кезегінде, мектеп оқушыларын жетік білім алуға итермелейтін стимул болары сөзсіз.
Сонымен қатар студенттерге жоғары білім алуға мүмкіндік беретін, жылдық мөлшерлемесі 2-3%-ды ғана құрайтын жеңілдетілген несиелер жүйесін енгізу — білім алудың қолжетімділігін арттыруға бағытталған тағы бір қадам болары анық.
Президент сондай-ақ студенттерді жатақханамен қамтамасыз ету мәселесіне ерекше назар аударды. Жатақхананың болуы — жекеменшік оқу орындары үшін мемлекеттік тапсырыс алудың басты критерийіне айналуы керектігін тілге тиек етті.
Бұл ретте Әлихан Бөкейхан Университеті осы жылдың қазан айында өз қаражаты есебінен тұрғызған 500 орындық жаңа жатақхананың іске қосатынын атап өткім келеді. Кез келген жоғары оқу орны өз студенттеріне толыққанды жағдай жасауға ұмтылуы тиіс. Бұл ретте Президент тапсырмалары бізге үлкен жауапкершілік артатынын жақсы түсінеміз.
Жалпы алғанда, Бөкейхан Университеті өңірдегі ең ірі жоғары оқу орындарының бірі ретінде Мемлекет басшысының қоғам алдына қойған міндеттерін орындауға қашанда дайын екенін мәлімдеймін!
Қадірлі әріптестер, құрметті жерлестер! Ел Президентінің халыққа Жолдауын бір кісідей жүзеге асыруға ат салысайық! Бірлігіміз мығым, бірлескен еңбегіміз елеулі болған жағдайда ғана, Президент айтқан әділетті мемлекет, біртұтас ұлт және берекелі қоғам қалыптастыра алмақпыз!
Құрметпен, Шырын Құрманбаева,
Әлихан Бөкейхан Университетінің ректоры,
саяси ғылымдар докторы, профессор
