Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығының ұжымы Қазақстан Республикасының Президенті Қасым-Жомарт Тоқаевтың Қазақстан халқына Жолдауын ниет қоя тыңдап, бір серпіліп қалды.
Біздің халық ерте заманнан әділеттілікті ту қылып ұстаған. Әділеттілікке ғасырлар бойы құрметпен қараған. Дана бабамыз Жүсіп Баласағұн «Әділдік жолын өзің аш» дейді. Бодандық кезеңнен қалған келеңсіздік «сызы» қоғамда әлі де көрініс беріп отырғаны жасырын емес. Әділеттілік кетіп, елдің қадірі кеткен заман туралы да Жүсіп Баласағұн: «Әділдіктің өзі кетіп, исі қалды» деген екен. Жолдауда әділеттілік жолын ашу басты ұстаным болған. Жолдау сонысымен қуатты.
Осы Жолдауда Мемлекет басшысы «Әділетті Қазақстан» ұғымын қолданады. Бұл, жалпылама сөзден нақтылыққа көшудің тура жолы. «Елдігімізді қорғаудың ең басты жолы — берекелі бірлік» дейді. Берекелі бірліктің нәрижесі – біртұтас ұлт болып ұйысу екенін де осы Жолдауда анық атап көрсеткен. Қазақстан әділетті мемлекет болады деу – үлкен батылдық, еліне, жұртына деген құрмет.
Сондай-ақ, Жолдауда жаңа экономикалық саясат пен оның ашықтығы кең қарастырылған. Басты кредосы – инновация. Кәсіпкерлікті жүйелі түрде қолдау. Мақсаты – халықтың әл-ауқатын арттыру. Жолдаудағы балалардың болашағы туралы ойлар ел еңсесін көтерді. Бұл Жолдау – Қазақ Елінің дамуына ерекше серпін берері хақ.
Әділеттілікті асқақтатқан Жолдау — өмірге жаңаша көзқарас әкелді. Ендеше, Мемлекет басшысының Жолдауын баршамыз қолдап: «Әділетті Қазақстанды бірге құрайық! Қасиетті Отанымызды бірге өркендетейік, ағайын!».
Шаңбай ТҰРДЫҚҰЛ,
Қазақстанның еңбек сіңірген қайраткері
