Өткен аптаның соңында Абай облысының әкімі Нұрлан Ұранхаев “Қытай-Еуразия” VII ЭКСПО көрмесіне қатысты. Айта кетерлігі сол, аталмыш көрме Үрімші қаласында онлайн және офлайн форматта ұйымдастырылған болатын.
Жалпы, “Аспан асты елі” мен “Ұлы Дала Елі” арасындағы сауда-экономикалық қарым-қатынастар тарихы мыңдаған жылдарға созылып, біздің өңірлерімізбен үздіксіз байланысты болып келеді. ҚХР-мен шектесетін жаңадан құрылған Абай облысы Қытай Халық Республикасымен өңіраралық қатынастарды нығайтуға аса мүдделі. Бұл үшін облыста өзара тиімді экономикалық ынтымақтастықты одан әрі тереңдету үшін барлық алғышарттар бар. Атап айтар болсақ, өнеркәсіптік ынтымақтастық саласында әлемдегі игерілмеген ең үлкен мыс кен орындарының бірі Абай облысының аумағында орналасқан. Бізде ірі индустриялық жоба — Ақтоғай КБК іске қосылды. Байыту комбинатының өнімі Қытай нарығына бағытталған, мыс концентратының көп бөлігін ҚХР-да өңдеу жоспарланған, бұл өзара тиімді ынтымақтастықтың көрсеткіші болып табылады.
Сонымен қатар, екі аймақтың арасындағы ыңғайлы географиялық орналасу және транзиттік әлеует бар. Көлік-логистикалық ынтымақтастық саласында біздің облысты Қытай мен Ресей арасындағы көпір деп санауға болады. Осыған байланысты алдағы уақыттарда жүзеге асырылуы тиіс Аягөз-Бақты-Шәуешек бағыты бойынша темір жол құрылысы жобасының да болашағы аса зор.
Мұнымен қатар, “Бақты” шекара бекетінде жекелеген әкімшілік рәсімдерді оңайлату үшін тексеруден өтудің жеделдетілген режимі енгізілді, көрсетілген бекеттерде қытай тілінде жеке көлікте шекарадан өту алгоритмдері әзірленді және орналастырылды. Үшінші: Туризм саласында қытайлық туристер үшін негізгі нысан дамыған туристік инфрақұрылымы бар Алакөл көліне бару болуы мүмкін.
Жалпы, Абай облысы бірегей табиғи әлеуетімен, бай тарихи-мәдени мұрасымен барлық туристік бағыттарды дамытуға мүмкіндік береді.
Нұрлан Ұранхаев өз сөзінде Абай облысы сындарлы диалогқа және барлық бағыттар бойынша өзара тиімді серіктестікке дайын екенін баса атап өтті. Осылайша Қытай Халық Республикасының іргелес орналасқан Шыңжаң-Ұйғыр автономиялық ауданы мен Қазақстан Республикасының Абай облысы арасында берік бауырластық байланыстар орнату ниеті туралы арнайы хаттамаға қол қойылды.
«СТ» — ақпарат