АУДАН ТҰРҒЫНДАРЫМЕН КЕЗДЕСТІ
Шығыс Қазақстан облысының әкімі Даниал Ахметов жуырда Тарбағатай ауданына жасаған жұмыс сапары барысында Ақжар ауылының тұрғындарымен арнайы кездесу өткізді. Жүздесу барысында алдағы уақыт атқарылуы тиіс жұмыстар жайында кеңінен сөз қозғалды.
Осыған дейін ШҚО басшысының арнайы тапсырмасы- мен аудан әкімі, депутаттар, тұрғындардың бастамашыл тобы бірлесіп, жақын арада жүзеге асырылуы тиіс міндеттер жоспарын жасаған болатын. Жоспарда ең алдымен аудандағы су бұру және коммуникация мәселелері қамтылды. Соның нәтижесінде аталған мәселелерді шешуге облыс бюджетінен қажетті қаражат бөлінді.
Сондай-ақ ауданды дамытудың перспективалық жоспары жасалды. Оған мектептер мен әлеуметтік нысандар құ- рылысы және ТҮКШ мәселелеріне қатысты іс-шаралар ен- гізілді. Кездесу барысында айтылғандай, биылғы жылы Тарбағатай ауданында көп балалы және аз қамтылған отбасылар үшін 48 үйдің құрылысы басталады. Осыған орай жер учаскелерін дайындап, ауданды сапалы интернет бай- ланысымен қамтамасыз ету үшін антенна-матч құрылыстарын салуға бюджеттен арнайы қаржы бөлінген. Сонымен қатар пайдаланылмайтын жайылымдарды қайтару бағытындағы жұмыстар бақылауда тұр. Мал ша- руашылығы дамыған аудан тұрғындары үшін бұл маңызды мәселелердің бірі болып саналады. Кездесу барысында сонымен қатар ел Президенті Қасым-Жомарт Кемелұлы Тоқаевтың Жолдауы талқыланды. Бұл Жолдауында Мемлекет басшысы ауыл шаруашы- лығын дамытуға баса назар аударып отырғаны, сауатты субсидиялау, ауылды дамытуды қолдау және басқа да жобалар енгізілетіні туралы айтылды. Тағы бір айта кетер жайт, аудандағы есеп беру кездесулерінде айтылған маңызды мәселелердің бір бөлігі толық- тай шешілген.
— Біз денсаулық сақтау және білім беру саласындағы маңызды жобаларды жалғастырамыз және ауыл тұрғындары- ның тарих мұражайын ашу туралы бастамасын қолдаймыз, — деді аймақ басшысы Даниал Ахметов.
Дана ТАЛҒАТБЕК,
«Семей таңы»
