«ЖАСЫЛ АЛАҢ» ОБЛЫСТЫҚ СЛЕТІНДЕ
Өсіп келе жатқан жас буын ұрпаққа экологиялық тәрбие беру, аймақтағы туристік қозғалысты дамыту мақсатында Катонқарағай мемлекеттік ұлттық табиғи паркінің ұйымдастыруымен жыл сайын «Жасыл Алаң» облыстық эколого-туристік слеті дәстүрлі түрде өткізіледі.
«Жасыл Алаң» эколого-туристік слетінің мақсаттары мен міндеттері мектеп оқушылары арасында табиғи ортада өзін-өзі ұстау ережелерін, жорық жағдайында алғашқы медициналық көмек көрсетуді, туристік дағдыларды үйрету, жас жеткіншектер арасында салауатты өмір салтын насихаттау, ұлттық мәдениетті және басқа ұлттардың мәдениетін құрметтеуге тәрбиелеу болып табылады.
Биыл Балалар жылы аясындағы слетті «Сарымсақты» туристік-экскурсиялық бағыты бойынша өткізді, оған «Жас турист станциясы» мекемесінің тәрбиеленушілері қатысты. Оқушылар саяхатқа шығып, серуендеп қайтты.
Аталмыш іс-шара Катонқарағай ұлттық паркінің экологиялық ағарту және туризм бөлімінің басшысы Самат Қайратұлының құттықтау сөзімен ашылды. Ұлттық парк қызметкерлері қатысушыларға шеберлік сыныбын өткізіп, туристік кедергілермен таныстырып өтті. Төрт команданың арасында жарыс түрінде өткен бағдарлама аспалы көпір, өткел, параллельді өткел, шатырды дұрыс құрау және жинау, алау жағу, туристік байламдардың түрін көрсету және компос кезеңдерінен тұрды.
Қатысушы командалар бар күш-жігерлерін салып, бұл жарыста өздерін жақсы қырларынан көрсетті. Қорытынды нәтиже бойынша бірінші орынды «Экстрим», екінші орынды «Тұран», ал жүлделі үшінші орынды «Қазақ стиль» командасы айқын басымдықпен жеңіп алды. Жарыс соңында жеңімпаз командаларға мадақтама қағаздары және бағалы сыйлықтар тапсырылды.
Қатысушы командалар мен топ жетекшілеріне алғыс білдіреміз, осындай игі іс-шаралар жыл сайын жалғасын таба берсін!
А.НИГМЕТОВА
