Аймақ басшысы Н.Ұранхаев Румынияның Констанца қаласында қазақ күресінен және тоғызқұмалақтан әлем кубогының иегерлерін жеңістерімен құттықтап, арнайы марапат ұсынды. 15 елдің балуандары сынға түскен бұл сайыста 3 жерлесіміз әлем кубогының иегері атанды.
Жарысқа қатысушы облыстық полиция қызметкері, лейтенант Сафуан Мұратбеков Қазақстан құрамасы қатарында 74 келі салмақ дәрежесінде сынға түсті. Алғашқы кезеңде Молдава мен Франция өкілдерінен басым түссе, ақтық белдесуде Румыния спортшысын шаң қаптырған.
Тағы бір мақтанышымыз Әсет Ахметжанов 90 келі салмақта топ жарды. Балуан Польша, Пәкістан, Қазақстан, ал ақтық сында Франция өкілін жеңді.
Ал, тоғызқұмалақтан қатысып, 15 жасында әлем кубогының иегері атанған Аяна Исахан 19 жасқа дейінгі блицта жеңімпаз атанса, рапидте 3 орынға ие болған.
-Абай еліне тұңғыш халықаралық дәрежедегі спорт шеберін иеленіп оралғаныма өте қуаныштымын. Бұл ортақ жеңіс. Абай облысын осы жеңіспен құттықтаймын. Өзім полиция қызметкерімін. Алдағы уақытта да жұмысым мен спорт саласын қатар ала жүріп, әлі талай жеңіс сыйлаймын деген сенімдемін,- дейді жеңімпаз Сафуан Мұратбеков.
Облыс әкімі жеңімпаздарға алғысын білдіріп, алдағы уақытта да абырой биігінен көрінуіне тілектес екенін жеткізді.
