Аудан әкімі қызметіне жақында ғана тағайындалған Ернар Мұстафин өңірдің тыныс-тіршілігімен танысу мақсатында ауданға қарасты кәсіпорындар мен мекемелерді аралауды бастап кетті.
Аудан әкімі «Қазмырыш» ЖШС Зырян тау-кен байыту кешені кәсіпорнының директоры И.Анисимовпен және директордың орынбасары Е.Қабдуалиевпен кездесті. Мазмұнды, екі тарап үшін де маңызды диалог форматында өткен кездесу барысында ынтымақтастықты одан әрі дамыту жолдары талқыланды. Әкім ауданның өзекті мәселелерін шешуге атсалысып отырған компания басшылығына алғысын білдірді.
Аудан басшысы сондай-ақ күн сайын ақпараттық-жарнамалық бағытта хабар тарататын «АЛВА» ЖШС телеарнасына барып, серіктестік директоры А.Шалапутовпен және редакцияның шығармашылық ұжымымен жүздесті. Өңір басшысы телестудиянвң материалдық-техникалық базасымен танысты, жаңалықтар қызметінің ақпараттық-студиялық блогын, түсірілім павильонын аралап көрді. Аудан әкімі ақпаратты жиі жаңартып отыру, жедел хабар тарату өте маңызды екенін атап өтті. Бүгінде телеарналар көрермендермен тікелей байланыс орнатуда және жаңалықтар лентасын қалыптастыруда ерекше орын алады. Ернар Рысқазыұлы редакция ұжымына шығармашылық табыс тілеп, тұрғындарды ақпараттандыру мақсатында жұмыс істейтін БАҚ өкілдеріне алғысын білдірді.
Өңір басшысы аудандық сот төрағасы А.Садықовамен де кездесті. Жүздесу барысында ел Президенті Қасым-Жомарт Тоқаевтың «Әділ мемлекет. Біртұтас ұлт. Өркендеген қоғам» атты Қазақстан халқына Жолдауында көтерілген апелляция институтын реформалау бастамасын жүзеге асыру, әділ сот қалыптастыру туралы тапсырмалары талқыланды. Аудан әкімі сондай-ақ тұрғындармен тікелей, ашық қарым-қатынас орнату, жеке мәселелерін, өтініш-тілектерін тыңдап, шешу жолдарын қарастыру мақсатында жеке қабылдау да өткізді. Қабылдауға келген азаматтардың бірі аудан орталығындағы ескі қала деп аталатын шағын аудандағы Гастелло көшесінің жол жабынын жөндеу туралы тұрғындардың өтінішін жеткізді. Тағы бір азамат жалға берілетін тұрғын үй мәселесін көтерді, сол сияқты қабылдауда кәсібін ілгерілетуге қолдау көрсетуді өтініп келеген жас кәсіпкер де болды. Тұрғындардың өтініштерін мұқият тыңдаған аудан басшысы барлық мәселелер назарға алынып, шешімін қарастыру үшін мемлекеттік органдар басшыларына тиісті тапсырмалар берілетінін жеткізді.
Дана ТАЛҒАТБЕК,
«Семей таңы»