Облыс әкімдігінде аймақ басшысы Нұрлан Ұранхаев және Қазақстан Республикасының сыбайлас жемқорлыққа қарсы іс-қимыл агенттігі төрағасының бірінші орынбасары Дмитрий Малаховтың қатысуымен облыс әкімдігінің жанындағы сыбайлас жемқорлыққа қарсы іс-қимыл жөніндегі өңірлік комиссия отырысы өтті. Жиынға сондай-ақ құқық қорғау мекемелерінің, облыс әкімдігінің құрылымдық бөлімше басшылары және БАҚ өкілдері қатысты. Кездесу барысында сыбайлас жемқорлықтың тәуекел картасына Абай облысы бойынша қандай салалар енгізілгені айтылды.
Жыл басында Қазақстан Республикасының 2022-2026 жылдарға арналған сыбайлас жемқорлыққа қарсы саясатының тұжырымдамасы қабылданды. Ол стратегиялық мақсаттарға қол жеткізуге, сыбайлас жемқорлықтың алғышарттарын жою және оның деңгейін төмендету бойынша кешенді жұмыстарды жүргізуге, қоғамда сыбайлас жемқорлыққа қарсы иммунитетті қалыптастыруға және халықтың әл-ауқатын жақсартуға бағытталған.
Тұжырымдама институционалдық және мақсатты бағыттарды қамтиды, сыбайлас жемқорлыққа қарсы күрестің жаңа тетіктерін әзірлеуді, сондай-ақ мемлекеттік органдар мен азаматтық қоғам субъектілерінің сыбайлас жемқорлықты жою жөніндегі жұмысқа қатысуын көздейді. Осы орайда сыбайлас жемқорлық тәуекелдерінің картасына облыс бойынша қандай салалар енгені жайында Дмитрий Михайлович облыс әкімі Нұрлан Ұранхаевпен болған кездесуде баяндап берді.
Қазақстан Республикасының сыбайлас жемқорлыққа қарсы іс-қимыл агенттігі төрағасының бірінші орынбасары сыбайлас жемқорлық тәуекелдерінің картасы өңірде әлеуметтік-маңызды проблемалар негізінде әзірленгенін, сондай-ақ облыстың сыбайлас жемқорлық тәуекелдері картасына азаматтардың әл-ауқатын тұрақтандыру мен тұрмыс сапасын қамтамасыз етуде келесі мәселелер енгізілгендігін айтып өтті. Яғни Абай облысы бойынша экология, жер, көлік, инфрақұрылым салаларында сыбайлас жемқорлық мәселелері көрінісін тапқанын түсіндіріп, аталмаш картада жаңа облыстар құрылған кезде пайда болатын тәуекелдер ескерілгендігін келтірді.
— Жаңадан құрылған облыс үшін жемқорлық әрекеттерін алдын-алу, тәуекелдерге талдау жасау, сыбайлас жемқорлықтың қай салада болмасын етек жаюына жол бермеу – басты міндет, — дейді Дмитрий Малахов.
Абай облысының әкімі Нұрлан Ұранхаев кездесуді қорытындылау барысында бұл бағытта барлық басқармалармен жұмыс жүргізіліп жатқандығын атап өтті. Сондай-ақ сыбайлас жемқорлыққа қарсы іс-қимыл агенттігімен тізе қосып жұмыс істеуге дайын екендігін, сол арқылы қоғамдағы осы бір індеттің облыс көлемінде алдын алуына барынша ықпал жасайтынын анық жеткізді.
