Сейсенбі, 27 қыркүйек күні облыс әкімдігінің жанындағы сыбайлас жемқорлыққа қарсы іс-қимыл жөніндегі аймақтық комиссияның отырысы өтті. Жиынға аймақ басшысы Нұрлан Ұранхаев, ҚР сыбайлас жемқорлыққа қарсы іс-қимыл агенттігі төрағасының бірінші орынбасары Дмитрий Малахов, құқық қорғау органдары мекемелерінің, облыс әкімдігінің құрылымдық бөлімшелерінің басшылары және БАҚ өкілдері қатысты.
Дана ТАЛҒАТБЕК,
«Семей таңы»
Отырыста сыбайлас жемқорлықтың тәуекел картасына Абай облысы бойынша қандай салалар енгізілгені айтылды.
Жыл басында Қазақстан Республикасының 2022-2026 жылдарға арналған сыбайлас жемқорлыққа қарсы саясатының тұжырымдамасы қабылданды. Ол стратегиялық мақсаттарға қол жеткізуге, сыбайлас жемқорлықтың алғы шарттарын жою және оның деңгейін төмендету бойынша кешенді жұмыстарды жүргізуге, қоғамда сыбайлас жемқорлыққа қарсы иммунитетті қалыптастыруға және халықтың әл-ауқатын жақсартуға бағытталған.
Тұжырымдама институционалдық және мақсатты бағыттарды қамтиды, сыбайлас жемқорлыққа қарсы күрестің жаңа тетіктерін әзірлеуді, сондай-ақ мемлекеттік органдар мен азаматтық қоғам субъектілерінің сыбайлас жемқорлықты жою жөніндегі жұмысқа қатысуын көздейді. Осы орайда сыбайлас жемқорлық тәуекелдерінің картасына облыс бойынша қандай салалар енгені жайында Дмитрий Малахов баяндап берді.
Қазақстан Республикасының сыбайлас жемқорлыққа қарсы іс-қимыл агенттігі төрағасының бірінші орынбасары сыбайлас жемқорлық тәуекелдерінің картасы өңірде әлеуметтік маңызды проблемалар негізінде әзірленгенін, сондай-ақ азаматтардың әл-ауқатын тұрақтандыру мен тұрмыс сапасын қамтамасыз етуде облыстың сыбайлас жемқорлық тәуекелдері картасына енгізілген салаларды атап өтті. Яғни Абай облысы бойынша экология, жер, көлік, инфрақұрылым салаларында сыбайлас жемқорлық көрініс тапқанын түсіндіріп, аталмаш картада жаңа облыстар құрылған кезде пайда болатын тәуекелдер ескерілгендігін айтты.
— Жаңадан құрылған облыс үшін жемқорлық әрекеттерінің алдын алу, тәуекелдерге талдау жасау, сыбайлас жемқорлықтың қай салада болмасын етек жаюына жол бермеу – басты міндет,- деді Дмитрий Малахов.
Жиынды қорытындылаған Абай облысының әкімі Нұрлан Ұранхаев бұл бағытта барлық басқармалармен жұмыс жүргізіліп жатқанын атап өтті. Сондай-ақ сыбайлас жемқорлыққа қарсы іс-қимыл агенттігімен тізе қосып жұмыс істеуге дайын екенін, сол арқылы облыс көлемінде қоғамдағы осы бір індеттің алдын алуға барынша ықпал жасайтынын жеткізді.
