Шығыс Қазақстан облысының Ұлан ауданында ұлттық жобаларды іске асыру аясында 20 инфрақұрылымдық жоба қолға алынды. Жоба аясында 222 тұрақты, 530 уақытша – барлығы 752 жұмыс орны құрылмақшы. Бұл туралы Шығыс Қазақстан облысының өңірлік коммуникациялар қызметінде өткен баспасөз конференциясында айтылды.
Аудан әкімі Ренат Құрмамбаевтың айтуынша, халықты жұмыспен қамтудың белсенді нысандарына жәрдемдесуге бағытталған іс-шаралар жоспарында іс жүзінде 367 адам жұмысқа орналастырылыпты. 1148 жаңа жұмыс орны құрылған. Оның ішінде 647 тұрақты, 501 уақытша және маусымдық жұмыстар бар. Білім беру және денсаулық сақтау саласының мамандарына сұраныс бар.
Өткен кезеңде 168 отбасыға атаулы әлеуметтік көмек тағайындалып, 43,5 млн теңге төленген. Тұрғын үй көмегі 87 отбасыға 2,5 млн теңге көлемінде тағайындалып, төленген. Ауданның 1614 тұрғынына жалпы сомасы 52,2 млн теңгеге қаржылай көмек көрсетілген.
Сонымен қатар «Нұрлы жер» бағдарламасы аясында Қасым Қайсенов кентінде 40 пәтерлі екі тұрғын үйдің құрылысы жүргізілуде. Жоспар бойынша жұмыстар ағымдағы жылдың қараша айында аяқталады.
Аудан әкімінің айтуынша, «Бір қабатты Шығыс» бағдарламасы бойынша Мамай батыр, Таврия, Герасимовка және Сағыр ауылдарында 13 үй бой көтерген. Ал Қасым Қайсенов кентінде 9 екі пәтерлі үйдің құрылысы жүруде.
Сонымен қатар Сағыр ауылында су құбырының құрылысы жалғасуда. Оны ағымдағы жылдың қараша айында аяқтау жоспарланып отыр. Пролетарка ауылында су құбыры желілерінің құрылысы басталып, І.Айтықов, Тайынты ауылдарында су құбыры желілерінің құрылысы бойынша конкурстық рәсімдер жалғасуда. Сондай-ақ ауданның 6 ауылында жалпы сомасы 300 млн теңгеге су тазарту станцияларын салу көзделіп отыр.
Зарина КӘП,
«Семей таңы»
