Абай атындағы кітапханада Қалибек Қуанышбаев атындағы мемлекеттік академиялық қазақ музыкалық драма театрының Семей қаласындағы гастрольдік сапарының ашылуына арналған баспасөз конференциясы өтті. Баспасөз конференцияға театр директоры Айболат Жаудыр, Қазақстанның еңбек сіңірген қайраткері, көркемдік жетекші Қуандық Қыстықбай, ҚР еңбек сіңірген қайраткерлері – Нұркен Өтеуіл, Жанқалдыбек Төленбаев, ҚР «Дарын» мемлекеттік жастар сыйлығының иегері, актер Әбілмансұр Серіковтер қатысты.
Қазақстан Республикасы Мәдениет және спорт министрлігі Мәдениет комитетінің «Қалибек Қуанышбаев атындағы мемлекеттік академиялық қазақ музыкалық драма театры» 29 қыркүйек пен 2 қазан күндері аралығында өз өнерлерін көрсетті. Елордалық театрдың Абай облысының орталығы Семей қаласына алғашқы гастрольдік сапарлары аймақ облыс мәртебесін алып, жаңадан құрылғанымен дәлме-дәл келді. Бұл жаңалықпен құттықтай отыра, қойылымдардың өтілу барысы жайлы театрдың көркемдік жетекшісі айтып өтті.
— Жаңа облысқа Мұхтар Әуезовтің 125 жылдығына орай гастрольдік сапармен келіп отырмыз. Бұл біздің Семей өңіріне гастрольмен бірінші рет келуіміз, Абай елінде өнер көрсету театр ұжымы үшін үлкен мәртебе! Гастроліміздің шымылдығын Оралхан Бөкейдің «Ұйқым келмейді» драмасымен аштық. Бұдан бөлек те қойылған төрт қойылым әр түрлі жанрда, өнерсүйер қауымның назарына ұсынылды. Көрермендер алғашқы қойылымнан-ақ театр залынан толқып шығып жатты, біз үшін бұл үлкен көрсеткіш, себебі көрермен көңілінен шығу үшін ұжым болып еңбек етеміз, — дейді Қуандық Қыстықбай.
Гастрольдік сапар аясында Семей қаласының көрермендері өңіріміздегі ең киелі сахна төрінде астаналық театр репертуарындағы үздік қойылымдарды тамашалады. Атап айтсақ, Халифа Алтай, Хасен Оралтайдың «Алтайдан ауған ел» қойылымы (режиссері – Фархат Молдағали), Шыңғыс Айтматовтың «Қызыл орамалды шынарым» лирикалық драмасы (режиссері – Талғат Теменов), Серік Тұрғынбекұлының «Шәмші» элегиясы (режиссері – Болат Ұзақов), Оралхан Бөкейдің «Ұйқым келмейді» драмасы (режиссері – Бәзіл Сұлтанғазы) және балаларға арналған «Бразилия байлығы» ертегісі.
— Ұлы тұлғалар туған киелі жерде сіздермен қауышып отырғанымызға қуаныштымыз! Әр өңірге барып, халықпен кездесу, қазіргі театрдың тынысы қалай жүріп жатқандығы жайлы сұхбаттасып, өз өнерімізді көрсету – бұл өнер адамдары үшін үлкен бақыт, — деп жүрек жарды тілегімен ҚР еңбек сіңірген қайраткері, актер Нұркен Өтеуіл бөлісті.
Абай атындағы театр сахнасында ұсынылған бұл қойылымдарды көруге келген өнерсүйер қауым театр залын лық толтырып, көрерменнің көптігінен ине шаншар жер қалмады.
Дана ТАЛҒАТБЕК,
«Семей таңы»
