Елімізде қазан айының алғашқы жексенбісінде Ұстаздар күні аталып өтеді. Ұстаздардың төл мерекесіне орай, Абай облысы білім басқармасының ұйымдастыруымен Семей қаласындағы Балалар мен жастар шығармашылық сарайында «Ұстазды ұлықтау – үлкен мәртебе» атты салтанатты жиын өтті. Мерекелік іс-шараға облыс әкімі Нұрлан Ұранхаев, облыстық мәслихат хатшысы Қуаныш Сүлейменов, Абай облысының білім басқармасы басшысының міндетін атқарушы Нұржан Ахметқалиев және өңір ұстаздары қатысты.
Бүгінде Абай облысында 17 мыңнан астам ұстазға ұрпақ тәрбиелеу миссиясы жүктелген. Орта білім беретін мектептерде 13517, мектепке дейінгі ұйымдарда 2315, қосымша білім беру ұйымдарында 430 мұғалім білім көшін алға жетелеп келе жатыр. Салтанатты жиынның шымылдығын облыс әкімі Нұрлан Ұранхаев ашып, барша ұстаздар қауымын төл мерекелерімен құттықтады. — Қадірлі ұстаздар! Ардақты білім саласының ардагерлері! Сіздерді кәсіби мерекелеріңізбен құттықтаймын! «Адамның адамшылығы жақсы ұстаздан» деген хакім Абайдың ұлағатты сөзі бар. Күні кеше облысымызға келген Мемлекет басшысы, ұстазға деген айрықша құрмет белгісіндей, еліміздің алғашқы кәсіби оқу орны Әуезов атындағы педагогикалық колледжге арнайы барды. «Ұстаз деген – қасиетті мамандық. Бәріміз ұстазды сыйлаймыз. Себебі ұстаз – жоғары деңгейдегі тұлға»,- деген еді Президент өз сөзінде, бұл – осында отырған әр мұғалімге берілген лайықты баға! — деді аймақ басшысы Нұрлан Тельманұлы. Мерекелік шарада облыс әкімі үздік педагогтерге алғыс хаттар пен төсбелгілер табыстады. Еліміздің білім беру саласына елеулі үлес қосқаны үшін және мемлекеттің гүлденуі жолындағы абыройлы еңбегі үшін Семей қаласы білім бөлімінің әдіскері Разия Омарова «Еңбек ардагері» медалімен марапатталды. Сондай-ақ «Техникалық және кәсіптік білім беру ісінің үздігі» төсбелгісі мен Абай облысының білім басқармасының және Абай облысы мәслихатының Құрмет грамоталары жемісті еңбек етіп жүрген ұстаздарға табысталды. — Құрметті ұстаздар, сіздерді мерекелеріңізбен құттықтаймын! Сіздерге жүктелген міндет ауыр екені белгілі. Себебі ұстаз сауатты һәм саналы ұрпақ тәрбиелейді. Әрине, жастарға сапалы білім беру үшін мұғалімнің өзі де білікті маман болуы шарт. «Ұстаздық еткен жалықпас үйретуден балаға» деп хакім Абай айтқандай, қажымай, талмай шәкірттерге білім беріп отырсыздар. Қоғам алдында абыройы асқақ әрбір кәсіптің иесі — ұстаздың алдын көрген кешегі шәкірт. Құрметті де ардақты жандар, жас ұрпаққа білім мен тәрбие беру жолындағы қажырлы еңбектеріңіз үшін алғыс білдіремін. Таусылмас шабыт және талапты шәкірт тілеймін, — деп құттықтады ұстаздарды Абай облысы білім басқармасының басшысы міндетін атқарушы Нұржан Нығметоллаұлы. Жиын соңында ұстаздардың назарына мерекелік концерт ұсынылды.
Дана ТАЛҒАТБЕК,
«Семей таңы»
