Өткен аптада Шығыс Қазақстан облысына жұмыс сапарымен ҚР Сыбайлас жемқорлыққа қарсы іс-қимыл агенттігі төрағасының бірінші орынбасары Дмитрий Малахов келді.
Сапар барысында Антикор төрағасының бірінші орынбасары өңірлік сыбайлас жемқорлық тәуекелдері картасына енгізілген бірқатар құрылыс нысандарындағы жұмыс барысымен танысты. Атап айтқанда Өскемен қаласында салынып жатқан Гематология орталығының және жолдардың құрылысымен танысты. Бүгінде аталған нысандардың құрылысы өңірдің Сыбайлас жемқорлыққа қарсы қызметінің бақылауында.
Сондай-ақ Сыбайлас жемқорлыққа қарсы қызмет төрағасының бірінші орынбасарының қатысуымен облыс әкімдігінде ШҚО әкімі Даниал Ахметовтің төрағалығымен Сыбайлас жемқорлыққа қарсы іс-қимыл мәселелері бойынша кеңес өтті.
Аталған кеңес барысында Дмитрий Малахов Сыбайлас жемқорлыққа қарсы іс-қимыл агенттігі әрбір облыс пен республикалық маңызы бар қала үшін сыбайлас жемқорлық тәуекелдерінің картасын әзірлегенін атап өтті. Бұл процестердің ашық болмауына, әкімшілік кедергілердің болуына, шенеуніктердің асықпауына немесе озбырлығына, заңнаманың жетілдірілмеуіне байланысты шешімін таппай келе жатқан көкейкесті мәселелердің тізбесі. ШҚО бойынша картаға өңірдің экологиясына, ұзаққа созылған құрылыс нысандарына, бағалы металдарды заңсыз өндіруге, жылыту маусымында көмір тапшылығына, жайылымдық жерлердің тапшылығына қатысты мәселелер кірді.
— Сыбайлас жемқорлыққа қарсы қызмет өзінің алдына міндетті түрде қылмыстық іс қозғауды мақсат етпейтіндігін атап өткім келеді, ең бастысы — бюджет есебінен салынып жатқан нысандар құрылысы сапалы жүргізіліп, белгіленген мерзімде тапсырылса, адамдар уақытында ауыз суға қол жеткізеді, сапалы жолмен жүреді, жаңа пәтерлер алады. Бұл тәсіл сыбайлас жемқорлыққа қарсы күресті әлсіретпейді, керісінше, бізді алдын ала әрекет ете отырып, тиімді қызмет жасауға бағыттайды, — деп атап өтті Дмитрий Малахов.
Сыбайлас жемқорлық тәуекелдері картасына енген барлық бағыттар бойынша облыс әкімі Даниал Ахметов тиісті мемлекеттік органдардың басшыларына нақты тапсырмалар беріп, олардың ағымдағы жылдың соңына дейін орындалуын қамтамасыз етуді міндеттеді.
ҚР Сыбайлас жемқорлыққа қарсы іс-қимыл агентігінің ШҚО бойынша департаменті
