Күршім ауданында өнеркәсіп саласын дамыту, соның ішінде халық тұтынатын өнімдер өндіру ісі жолға қойылуда. Бұл орайда кәсіп ашып, өндірген өнімдерін ауыл-аймағына ғана емес, облыс аумағында саудалап, нәсіп тауып отырған жандардың қатары артып келеді. Бұған жергілікті атқарушы биліктің кәсіпкерлік салаға көңіл бөліп, тұрғындарға жан-жақты қолдау көрсетуі септігін тигізіп отыр.
Айталық, жуырда Марқакөл ауылындағы «Нұралы» шаруа қожалығында сүт өңдеу цехы іске қосылды. Біраз уақыт бұрын аудандық мәслихаттың хатшысы, жергілікті қоғам белсендісі Мамырбек Калелов, аудандық мәслихат депутаты, АМАNАТ партиясының аудандық филиалының атқарушы хатшысы А.Абильмажинов, аудандық мәслихаттың депутаттары Р.Ақылбекұлы, А.Мұхаева аталған шаруа қожалығында болып, жаңадан ашылған сүт өңдеу цехының жұмысымен танысып қайтты.
Шаруашылық басшысы Амантай Икамбаевтың айтуынша, цех түгелдей жаңа құрылғылармен жабдықталыпты, алғашқы кезекте сынама мақсаттағы сүт өнімдерін шығарып үлгеріпті. Цехта ірімшіктің үш түрі, йогурттың екі түрі, айран, қатық, қаймақ, сары май сынды жергілікті халықтың жоғары сұранысына ие сүт өнімдері шығарылады. Аудан тұрғындары енді өздерінде өндірілген өнімдерді тұтынатын болады, бұл – қуантарлық жаңалық. Себебі мұндай өндіріс орны Шығыс Қазақстан облысында некен-саяқ.
Қазіргі күні цехта бір ауысымда бір тонна сүт өңделуде. Болашақта шикізат көлемін арттыру арқылы өнім көлемін де ұлғайту көзделіп отыр. Демек, қосымша жұмыс орындары да ашылады.
Тағы бір айта кетерлігі, мұнда өнімдер ешқандай қалдықсыз өндіріледі, тіпті ең соңғы сары суының өзі емдік мақсатта сұранысқа ие екен.
Өнімнің сапасы жоғары болуы үшін, істі білетін маман керек. Сондықтан Ресейден арнайы мамандар шақырылып, үш адам сүтті өңдеу технологиясын үйренген екен.
— Туған жеріміздің экологиялық таза, дәрумендерге бай, сапалы өнімдерін тұтынғанға не жетсін, әрдайым қолдаймыз. Цех қызметкерлерінің еңбектеріне табыстар тілейміз. Отандық өнімдер қашанда сұранысқа ие, — дейді аудандық мәслихаттың хатшысы Мамырбек Калелов.
Әлібек КЕМЕЛХАН,
«Семей таңы»
