Аудан басшысы Ернар Мұстафин ауданның дамуына өз үлестерін қосып жүрген жерлестермен байланысты үзбей, тығыз қарым-қатынас орнатқан. Жуырда Ернар Мұстафин Қазақстандағы ең ірі, табысты «Меломан» компаниясының тең иесі А.Дериглазовпен кездесті.
Дана ТАЛҒАТБЕК,
«Семей таңы»
Айта кетелік, бүгінде 30 жылдан астам тарихы бар компанияның құрамына енетін әр түрлі сауда, өндіріс және қызмет көрсету салаларындағы бірнеше кәсіпорындар табысты жұмыс істеуде, олар біздің елімізде ғана емес, одан тыс жерлерде де белгілі. «Меломан» холдингінің директорлар кеңесінің төрағасы Александр Дериглазов аудан әкіміне өз бизнесін қалай құрғанын айтып, алдағы жоспарларын бөлісті.
Компания екі бағытта жұмыс істейді: Алматыдағы «Меломан» сауда желісі және Шығыс Қазақстандағы «Комфорт» компаниясы. «Комфорт» үй тұрмысына қажетті заттарды — тұрмыстық тауарлар, құрылыс және әрлеу материалдары, тұрмыстық химия, үйге немесе саяжайға қажетті заттарды, сонымен қатар демалыс, спорт және туризммен байланысты барлық тауарларды саудалайды.
Компания өзінің меценаттығымен де танымал. Әр түрлі ұйымдарға үнемі қолдау көрсетіп келе жатқан кәсіпкер өзінің туған қаласы Алтайды да назардан тыс қалдырмайды. Компания басшылығы аудандағы аз қамтылған отбасыларға, балалар үйлері мен қарттар үйлеріне демеушілік жасап отырады. Сөз ретінде Осинов асуында туристерге арналған бақылау алаңын құру туралы бастама аталған компанияға тиесілі екенін айта кеткен жөн. Жоба аудан әкімдігі мен «ҚазАвтоЖол» ҰК» АҚ тарапынан қолдау тауып, бүгінде бұл жер әдемі фотосурет немесе «селфи» жасауға таптырмас тамаша орын ретінде аймақ тұрғындарының ғана емес, әр түрлі елдерден келетін қонақтардың сүйікті орнына айналып үлгерді.
Өңір басшысы кездесуде ауданның Құрметті азаматы болған кәсіпкердің әкесі Владимир Дериглазовтың туған жеріне сіңірген еңбегін де атап өтті.
