Қазақстандық автоөндірушілер ел аумағында Toyota корпорациясының зауытын ашу туралы келіссөздер жүргізуде. Бұл туралы Индустрия және инфрақұрылымдық даму министрі Қайырбек Өскенбаев мәлімдеді, деп хабарлайды Stan.kz ақпарат агенттігі.
Министрдің айтуынша, Toyota-ның ашылуы еліміздің ең мықты жетістіктерінің бірі болмақ.
“Қанша ақша құяды, қандай құзыреттерге ие, олар өткізу нарығына қаншалықты дайын – бәрі техникалық мәселелер. Келіссөздер жүргізілуде, ол жүзеге аса ма, аспай ма, белгісіз. Бірақ жақсы жағынан үміттіміз”, – деді Өскенбаев ОКҚ брифингінде журналистердің сұрақтарына жауап бере отырып.
Бұған дейін Toyota Ресейдегі зауытты жабатыны белгілі болды. Жергілікті БАҚ мәліметтері бойынша, шешім Ресей Федерациясындағы жағдайға байланысты қабылданған. Санкт-Петербургтегі Toyota зауыты 2007 жылдан бері жұмыс істеді. Кәсіпорында Camry және RAV4 модельдерін шығарудың толық циклі ұйымдастырылды.
