Семей қаласындағы Абай атындағы облыстық кітапханада жас жазушы, саяси ғылымдар докторы, Олбани университетінің саяси зерттеулер орталығының аға ғылыми қызметкері Тоғжан Қасенованың қазақ тіліндегі «Атом улаған дала: Қазақстанның бомбадан бас тарту жолы» кітабының тұсаукесері өтті.
Талшын ҚАЛИАСҚАР,
«Семей таңы»
Кітаптың тұсаукесер рәсіміне облыстық мәслихат хатшысы Қуаныш Сүлейменов, зиялы қауым өкілдері, ақсақалдар кеңесінің мүшелері және жоғары оқу орындарының студенттері қатысты.
Айта кетейік, «Атом улаған дала: Қазақстанның бомбадан бас тарту жолы» кітабы алғаш рет биылғы жылдың ақпан айында Stanford University Press-те жарық көрді. Монография Герман Қоғамдық Қауымдастығы Қазақстандағы Фридрих Эберт атындағы қорының қолдауымен қазақ тілінде басылып шығыпты. Тоғжан Қасенова бұл еңбегінде Қазақстанның кеңестік кезеңнен бүгінгі күнге дейінгі ядролық тарихымен таныстырады. Қазақстанның Кеңес Одағынан қалған ядролық қарудан бас тартуы туралы тарихи шешімі, Семей ядролық сынақ полигоны және өткен ядролық кезеңнің еліміздің бүгінгі күнінде қалай көрініс тапқаны, қазақ халқының сынақтардан тартқан зардаптары жайлы айтылады.
Кітаптың тұсаукесері талқылау алаңына айналып, шараға қатысушылар Қазақстанның ядролық саясаттағы тарихи шешімдері, Қазақстанда да, бүкіл әлемде де ядролық қаруды таратпау және қарусыздану саясатын ілгерілету мәселелерінің өзектілігі жайлы сөз қозғады. Абай облысы мәслихатының хатшысы Қуаныш Сүлейменов, «Невада – Семей» халықаралық антиядролық қозғалысының вице-президенті Сұлтан Картоев, тарихшы, археолог, тарих ғылымдарының кандидаты Аматай Исин кітаптың маңыздылығы мен өзектілігін айтып, авторға ризашылықтарын білдірді. Сондай-ақ олар ядролық жарылыстардың әлі де болса аймақтардағы экожүйеге, адамдардың өмірі мен денсаулығына айтарлықтай әсер ететіндігін, сондықтан бұл тақырыпты жиі қозғау қажет екенін атап өтті.
Жас ұрпақ үшін тағылымы мол шара аясында «Ядролық қарусыз әлем» атты кітап көрмесі ұйымдастырылып, онда Семей полигонындағы ядролық қару сынақтарының тарихы, оның экологиялық және әлеуметтік салдары, радиоактивті заттардың қоршаған ортаға және адам денсаулығына әсері және қазақстандықтардың ядролық сынақтарды тоқтату жолындағы қоғамдық күресі жайлы баяндалатын танымал әдебиеттер қойылды.
