Семейде қала полигонының аумағы қоршалатын болды. Мұндай тапсырманы шаһар әкімі Нұрбол Нұрсағатов жүктеді
Қала әкімдігінің мәліметіне сүйенсек, бүгінде семейліктерді алаңдатып отырған ең өзекті мәселелердің бірі — қоқыс және тұрмыстық қатты қалдықтарға арналған полигонның жай-күйі.
«Бүгін Семей қаласының әкімі Нұрбол Нұрсағатов полигонға барып, объектінің іргелес аумағын тиісті санитарлық жағдайға келтіруді тапсырды. Полигон аумағынан тыс жерге қоқыс желмен таралмас үшін қоқыс биіктігін екі есе арттыра отырып, бөлінген учаскенің айналасына торлы қоршау орнатылмақ», — делінген ақпаратта.
Сонымен қатар қаланың кварталішілік аумақтарынан қатты тұрмыстық қалдықты шығару мәселесін шешу үшін Н.Нұрсағатов контейнерлік алаңдарды, жаңа форматтағы контейнерлер санын ұлғайтуды тапсырды.
Әкім қатты тұрмыстық қалдықтарды шығару үшін қосымша техника сатып алу қажеттігін де айтты.
