Өткен аптада Семей қаласының жаңа әкімі тағайындалды. Қалалық мәслихаттың кезектен тыс сессиясында Абай облысының әкімі Нұрлан Ұранхаев депутаттарды Нұрбол Нұрсағатовтың кандидатурасымен таныстырды.
Нұрбол Нұрсағатов – Шығыс Қазақстан облысының тумасы, бұған дейін Абай облысы әкімінің орынбасары қызметін атқарған.
Нұрбол Төлегенұлы Нұрсағатов Шығыс Қазақстан облысында дүниеге келген. Е.А.Бөкетов атындағы Қарағанды мемлекеттік университетін, Л.Б.Гончаров атындағы Қазақ автомобиль жол институтын бітірген.
Еңбек жолын 2003 жылы бастаған. ҚР Индустрия және сауда министрлігінің Құрылыс істері жөніндегі комитетінде қызмет етті.
Әр жылдары Нұрбол Нұрсағатов Ауыл шаруашылығы министрлігі су ресурстары комитеті төрағасының орынбасары, Астана әкімдігі құрылыс басқармасы басшысының орынбасары, Астананың мемлекеттік сәулет-құрылыс бақылауы басқармасы директорының орынбасары, ШҚО көлік және автомобиль жолдары басқармасының, Алматы әкімдігі құрылыс басқармасының, Астана қоршаған ортаны қорғау басқармасының басшысы қызметтерін атқарған.
Депутаттар Нұрбол Нұрсағатовтың кандидатурасын бір ауыздан қолдап дауыс берді.
«Фейсбук» әлеуметтік желісінде Абай облысы орталығының жаңа басшысы төмендегідей жазба қалдырыпты:
«Құрметті Семей қаласының тұрғындары! Бүгіннен бастап мен қала әкімі лауазымына тағайындалдым. Бұл — мен үшін үлкен абырой және жауапкершілік.
Алаштың жүрегі, еліміздің мақтанышы болған ұлы тұлғалардың өлкесі, руханият пен өнердің, мәдениеттің ордасы Семей мемлекетіміздің тарихында және болашағында айрықша маңызды орын алады. Көптеген салада еңбек ерлерімізбен мақтана аламыз, соның ішінде ауыл шаруашылығы, егіншілік, әдебиет, өнер, ғылым және білім саласы.
Мен өзім де шығыс өңірінің тумасымын, көңілім әр уақытта Семейге бұрылып тұрады. Сондықтан да Семейдің әлеуметтік-экономикалық жағдайын, инфрақұрылымын, абаттандыруын, тұрғын-үй шаруашылығының жағдайын жақсарту үшін аянбай еңбек етемін. Мемлекет және Абай облысының басшылығына артқан сенімдері үшін алғыс білдіремін.
«Алтау ала болса – ауыздағы кетеді, төртеу түгел болса – төбедегі келеді» деген ата-бабаның қалдырған өшпес даналығы бірліктін қажет екенін еске салады. Қаламыздың өркендеуі үшін бірлесіп күш салайық. Мен сіздермен кері байланыс орнатып жұмыс жасауға ниеттеніп отырмын, әзірше әлеуметтік желідегі парақшаларыма жазуларыңызға болады, жақын арада сіздермен кездесулер өткіземіз, сонымен қатар қабылдау кестесін жариялап, байланыс телефонын хабарлаймыз.»
Сонымен, жаңа әкім жұмысын бастады. Жауапкершілік жүгі жеңіл емес. Қыс болса қыр астында. Семейдің әкімдері үшін ең жауапты сынақ та осы мерзім. Нұрсағатовтың келуімен Семей нұрлана түссін деп тілейік!
«СТ» — ақпарат
