Абай облысында биыл мүмкіндігі шектеулі 220 адам жұмыспен қамтылған, деп хабарлайды ҚазАқпарат тілшісі.
Абай облысының әкімі Нұрлан Ұранхаев мүмкіндігі шектеулі жандармен кездесіп, оларды толғандырған сауалдарға жауап берді. Мүгедектігі бар азаматтар қоғамдық көліктерде, жер асты өткелдері мен түрлі ғимараттарда пандустардың жоқтығын, инватакси, тонометр, қоларбалардың жеткіліксіздігін және жұмыспен қамту деңгейінің төмендігі секілді мәселелерді көтерді.
«Осы орайда аймақ басшысы бірінші топ мүгедектігі бар Руслан Ерембаевты өзіне штаттан тыс кеңесші етіп тағайындады. Бұл бастама мүмкіндігі шектеулі жандардың мәселесін бақылауда ұстап, сала мамандарымен бірлесе отырып, оларды шешу жолдарын қарастыруға мүмкіндік береді», — деп хабарлады әкімнің баспасөз қызметінен.
Бүгінгі таңда өңір бойынша 28 мыңнан астам мүгедектігі бар адам тұрады. Оның ішіндегі 3 000-ға жуығы балалар.
«Мүгедектігі бар адамдарды әлеуметтік қолдау, олардың өмір сапасын жақсарту — мемлекет саясатының басты бағыттарының бірі. Сондықтан инватакси, пандус, медициналық құрылғылар, қоларбалар және өзге де қажетті заттармен толықтай қамтамасыз етеміз. Мүмкіндігі шектеулі жандарға кедергісіз орта қалыптастыру мақсатындағы жұмыстар жалғасуда. Мемлекеттік қызмет көрсететін 575 нысан 2025-ші жылға дейін толықтай бейімделетін болады», — деді Нұрлан Ұранхаев.
2021-2025 жылдарға арналған кәсіпкерлікті дамытудың ұлттық жобасы аясында биылғы 9 ай ішінде облыстағы мүмкіндігі шектеулі 220 адам жұмыспен қамтылған. Оның 75-і тұрақты жұмысқа алынған болса, 10 адам жастар тәжірбиесі бойынша, 125-і қоғамдық жұмысқа, 5-еуі әлеуметтік жұмыс орнына, тағы бесеуі «Күміс жас» жобасы бойынша еңбек етуде.
Бұдан бөлек, 2021 жылы әлеуметтік қызмет порталы құрылды. Портал бойынша мүгедектігі бар адамдар техникалық көмек құралдарын, сурдо, тифло құрылғылар және санаторий, курорттық емдеу орнын және жеке көмекші маманын өздері таңдай алады.
