Мәжілісте өткен үкімет сағатында ҚР Индустрия және инфрақұрылымдық даму министрі Қайырбек Өскенбаев ақы енгізілетін жолдардың тізімін атады, деп хабарлайды Stan.kz ақпарат агенттігі.
Министрдің мәліметінше, қазіргі уақытта ақылы жолдардың ұзындығы 2,2 мың шақырымды, ал алым сомасы 4 млрд теңгеге жеткен. Ол 11 жол учаскесінде ақы енгізілгенін айтты. Атап айтсақ: Астана – Щучинск, Астана – Теміртау, Алматы – Қонаев, Алматы – Хорогос, Қонаев – Талдықорған, Тараз – Қайнар, Шымкент – Тараз, Шымкент – Ташкент, Шымкент – Қызылорда, Щучинск – Көкшетау, Астана – Павлодар.
“Жеңіл автокөліктер 1 шақырым жолға 1 теңге, ал жүк көліктері 25 теңге төлейді. Бұдан бөлек жолдарға кететін шығынды ақтау үшін ұзындығы 2,5 мың шақырымға жететін ІІ санаттағы автожолдары стандартты жағдайға келтіргеннен кейін төлемді енгізу жоспарлануда”, – деді министр.
Бұған қоса ол қазір маусымаралық жол жөндеу жұмыстары жүргізіліп жатқанын алға тартты.
2025 жылға дейін қайта жаңарту жұмыстары аяқталғаннан соң 11 мың шақырымға жететін жол учаскелері үшін ақы енгізу қарастырылған, деді ол. Алдағы уақытта ақылы болатын жол учаскелері: Қызылорда – Арал, Ақтөбе – Орал, Ақтөбе – Орынбор, Қайнар – Бішкек, Жетібай – Шетпе – Бейнеу – Ақжігіт, Павлодар – Семей, Астана қаласының солтүстік айналма жолы, Орал – Саратов, Көкшетау – Петропавл, Астана – Атбасар, Павлодар – Омбы, Семей – Қалбатау. Бұл учаскелердің жалпы ұзындығы 2579 шақырымға жетеді.
