Абай облысында, 25 қазан — Республика күніне орай, 200-ге жуық іс-шара өтеді. Бұл туралы Абай облысының мәдениет, тілдерді дамыту және архив ісі басқармасы басшысы Айдар Ибраев, Қоғамдық даму басқармасының басшысы Айдар Садырбаев баспасөз конференциясында айтып берді.
Жадыра ТӨЛЕГЕНҚЫЗЫ,
«Семей таңы»
Мемлекет басшысы Қасым-Жомарт Кемелұлы Тоқаев 16 маусымда Ұлытауда өткен Ұлттық құрылтайдың бірінші отырысында сөйлеген сөзінде Республика күні мәртебесін қайта қалпына келтіру және оны 25 қазанда ұлттық мереке ретінде атап өтуді ұсынған болатын.
— Өздеріңіз білетіндей, 2009 жылға дейін Республика күні мемлекеттік мереке дәрежесінде аталып келді. Бұл ретте ҚР Тәуелсіздік күні мен Республика күні арасындағы мазмұндық, және мағыналық айырмашылықтың бар екенін айта кету керек. Тәуелсіздік күні біздің елімізді әлемдік қауымдастық алдында дербес мемлекет және халықаралық құқық субъектісі ретінде дәлелдейтін «ҚР Мемлекеттік тәуелсіздігі туралы» конституциялық заңның негізінде 1991 жылы 16 желтоқсанда қабылданған мереке болса, Республика күні Жоғарғы Кеңестің Қазақстанның мемлекеттік егемендігі туралы декларациясының қабылданған күнін меңзейді. Сондықтан екі датаның да тарихи рөлі бар. Дегенмен 25 қазан күні Қазақстанның алғаш рет өзіндік дүниетанымы, салт-дәстүрі, болашағының пайымдауы бар бірегей аумақтық субьект ретінде жарияланғанын ерекше атап өткім келеді,- деді Айдар Садырбаев.
Республика күніне орай, облысымызда бірнеше нысан ашылып, халық игілігіне берілмек. Атап айтсақ, 19 қазан күні Семей қаласындағы №47 жалпы орта білім беретін мектепте Ахмет Байтұрсынұлы атындағы кабинет, 20 қазан күні Көкпекті ауданындағы Көкжайық ауылында көпсалалы спорт залы және Бородулиха ауданындағы Коростели ауылында демалыс саябағы, 21 қазан күні Семей қаласындағы Степной кентінде 300 орынға арналған мектеп және «Авиценна» жоғары медициналық колледжінің жаңа әкімшілік корпусы, 22 қазан күні Көкпекті ауданындағы Теректі ауылында кіші футбол алаңы, 24 қазан күні Үржар ауылындағы Қабанбай ауылында жаңа спорт модулі есігін айқара ашады. 25 қазан күні Семей қаласындағы Қарағайлы ықшам ауданында көп пәтерлі тұрғын үйдің кілттерін табыстау және Аягөз қаласында жаңа аллеяның ашылу рәсімі өтеді деп жоспарлануда.
Ал мәдени-көпшілік шаралар мен концерттер 22 қазан күні Семейдегі Абай атындағы театрда және қалалар мен аудандардағы мәдениет үйлерінде бастау алмақ. Бұл күні еліміздің дамуына түрлі сала бойынша үлес қосқан азаматтар мемлекеттік марапаттар мен алғыс хаттар тапсырылатын болады. Сонымен қатар Абай облысынан 10 адам Астана қаласында Республика күніне орай өтетін салтанатты кешке қатысады. 25 қазан күні қалалар мен аудандарда «Жанашыр жүрек» қайырымдылық акциясы, ағаш отырғызу акциялары, автокөлік шерулері, Орталық алаңда жәрмеңкелер, көрмелер мен концерттер, сондай-ақ Семей қаласындағы Шәкәрім атындағы университетте «Қазақстан жастары – ел болашағы» атты облыстық дебат ойындары өтеді.
— Абай облысының барлық қала-аудандарында, Республика күніне орай, 130-дан астам түрлі деңгейдегі мәдени-бұқаралық шара — концерттер, патриоттық акциялар, көрмелер, байқаулар, поэзия кештері, дөңгелек үстелдер ұйымдастырылады. Абай атындағы облыстық кітапханада «Желбірейді көк байрағы елімнің» атты жас ақындар шеруі, Әміре Қашаубаев атындағы облыстық мемлекеттік филармонияда мерекелік концерт, Невзоровтар отбасы атындағы облыстық бейнелеу өнері музейінде «Сүйікті қалам, Семейім» атты суретшілер көрмесі, Достық үйінде бірқатар мәдени іс-шаралар,
Жарма, Ақсуат аудандарында патриоттық әндер байқауы және өзге де аудандарда өнер фестивальдары өтеді.
Қазан айынан бастап әлеуметтік желілерде «Қыран елім -Қазақстаным» атты патриоттық акция басталып кетті. Ал 25 қазан күні Арбат алаңында қала тұрғындары мерекелік концертті тамашалайтын болады,- деді Абай облысының мәдениет, тілдерді дамыту және архив ісі басқармасы басшысы Айдар Ибраев.
