Елімізде «Мейірімділік керуені» байқауына қатысуға өтінімдер қабылдана бастады.
Абай облысының аймақтық коммуникациялар қызметінде өткен брифингте «Семей қаласының іскер әйелдер қауымдастығы» қоғамдық бірлестігінің атқарушы директоры Әсия Нығметова мен Семей қаласының іскер әйелдер қауымдастығы» қоғамдық бірлестігі басқарма мүшесі Данажан Серікбаева V Республикалық «Мейірімділік керуені» байқауының өткізілуі туралы айтып берді.
Саяжан КЕРІМБЕКОВА
«Семей таңы»
— Конкурсқа әлеуметтік, қоғамдық мәселелерді шешуге үлестерін қосып жүрген және өздерінің игі істерімен басқаларды ынталандыра алатын жеке және заңды тұлғалар қатыса алады, — деді Әсия Нығметова.
Спикердің айтуынша, кәсіпкерлік субъектілері, сондай-ақ қайырымдылық шараларды мемлекеттік грант, мемлекеттік тапсырыстар сияқты мемлекеттің қолдауымен жүзеге асыратын тұлғалар қатыса алмайды.
— Байқау лауреаттары әр түрлі номинациялар бойынша анықталады. Мысалы, «Асар» аталымы қайырымдылық қызметі ұлттық салт-дәстүрлермен байланысты және ұлттық мәдениетті сақтауға көмектесетіндерге беріледі, ал «Туған жер» номинациясы білім беру, экология және абаттандыру, мәдени нысандарды қалпына келтіру және т.б. салаларда туған өлкесіне қайырымдылық қызметін көрсететін азаматтарға тапсырылады. «Батыл жүрек» батырлық пен батылдық көрсеткен жандарға беріледі. Байқауға бұл аталым бойынша ТЖ, ІІМ, жедел жәрдем сияқты шұғыл қызмет мамандары қатыса алады. Ал белгілі бір уақыт ішінде тұрақты түрде өтеусіз көмек көрсететін адамдар үшін «Мейірім жолында» номинациясы тағайындалады. Сондай–ақ «Қайырымдылық тарихы» аталымы журналиске немесе шығармашылық ұжымға БАҚ-та жарияланған қайырымдылық жайлы және әлеуметтік мәселелерді көтерген үздік мақалалар үшін берілетін болады. Осы сынды басқа да аталымдар бар. Толық ақпараттарды Нұрсұлтан Назарбаев Қоры немесе Қазақстанның Іскер әйелдер қауымдастығы сайттарынан оқи аласыздар, — деді Басқарма мүшесі Данажан Серікбаева.
Айта кету керек, конкурсқа қатысуға өтінімдер 2022 жылғы 30 желтоқсанға дейін қабылданады. Өтінімдер жергілікті, яғни өңірлерде қабылданатын болады.
Еске сала кетелік, «Мейірімділік керуені» байқауы халықтың азаматтық бастамаларын жандандыруға және және мейірімділік пен гуманизм сияқты адамгершілік құндылықтарды нығайтуға бағытталған.
