Қазақстан премьер-министрі Әлихан Смайылов сыбайлас жемқорлықтан қайтарылған қаражат қараша айында мектеп құрылысына салынатынын мәлімдеді, деп хабарлайды Stan.kz ақпарат агенттігі.
Мемлекет басшысының тапсырмасы бойынша жемқорлардан тәркіленген қаражаттар мектеп және оларға қосымша құрылыстар салуға бағытталады.
Бүгінгі таңда республика бойынша жемқорлардан алынған 100 млрд теңге бар. Қараша айында бұл ақшаны бөлу үрдісі басталады.
Түркістан облысының кешенді әлеуметтік-экономикалық даму мәселелері жөніндегі кеңесте облыс әкімі Дархан Сатыбалды өңірдегі ағымдағы ахуал, негізгі экономикалық көрсеткіштер және инвестициялық жобаларды іске асыру барысы туралы айтып берді. Сондай-ақ, индустрия және инфрақұрылымдық даму, мәдениет және спорт министрі, ағарту министрі және энергетиканың бірінші вице-министрі Мұрат Жүребеков пен ауыл шаруашылығы вице-министрі Жеңіс Өсербай баяндама жасады.
Премьер-министрдің айтуынша, биыл облысты дамытуға республикалық бюджетте 367 млрд теңгеден астам қаражат қарастырылған. Бюджетті нақтылау кезінде тағы 100 млрд теңге бөлінген.
«Бұл қаражат инженерлік инфрақұрылымды дамытуға, әлеуметтік мәселелерді шешуге және өңірдің агроөнеркәсіптік кешенін қолдауға бағытталған. Жоспарланған нәтижелерге қол жеткізу үшін бюджет қаражатын мақсатты және тиімді пайдалану қажет», — деді Смайылов.
Ол Қожа Ахмет Яссауи кесенесінің сақталуын қамтамасыз ету мәселесін тілге тиек етті.
“Қазіргі уақытта бірегей нысанның айналасында қарқынды құрылыс жүргізіліп жатқандықтан, оған келушілер саны да едәуір артты. Осыған байланысты әкімдік ЮНЕСКО мен басқа да халықаралық ұйымдардың ұсынымдарын қатаң сақтауы тиіс”, – деді ол.
Мәселелердің экономикалық блогына көше отырып, Әлихан Смайылов азаматтардың әл-ауқатын арттыру үшін бірінші кезекте өңірдің дамуына серпін бере алатын жаңа инвестициялық жобаларды іске қосу шараларын қабылдау қажет екенін атады. Ағымдағы жылы облыста 33 млрд теңгеге 29 жобаны іске асыру жоспарланған, қосымша 1,9 трлн теңгеге тағы 74 жоба пысықталуда.
«Осындай жобаларды іске асыру есебінен жаңа жұмыс орындары пайда болады. Әкімдік ірі инвесторларды тарту үшін жағдай жасап, жобалардың белгіленген мерзімде сапалы іске асырылуын қамтамасыз етуі қажет», — деп түсіндірді премьер-министр.
