Семей қаласының Шәкәрім атындағы университетінде «Ахмет Байтұрсынұлы – қазақ руханиятының көсемі» атты республикалық ғылыми-тәжірибелік конференция өтті.
Семей қаласының білім бөлімі мен Ахмет Байтұрсынұлы атындағы №47 мектеп педагогтері бірлесіп ұйымдастырған іс-шараға онлайн және офлайн форматта Абай облысының және Семей қаласының әкімдіктері, Шәкәрім университетінің басшылығы мен профессор-оқытушылары және БАҚ өкілдері мен отандық ахметтанушы ғалымдар қатысты.
Конференция аясында Ахмет Байтұрсынұлының өмір тарихы мен шығармашылығынан сыр шертетін Ахметтану кабинеті ашылды. Кабинет лентасын Шәкәрім университетінің ректоры Б.Ердембеков пен облыстық білім басқармасының басшысы Н.Ахметқалиев жүргізді.
Ахметтану кабинетінің ашылу салтанатында сөз сөйлеген Шәкәрім университетінің басқарма төрағасы — ректор Бауыржан Ердембеков тағылымды шараның маңыздылығын атап өтіп, 1912 — 1925 жылдар аралығында Ахмет Байтұрсыновтың оқу құралы баспадан 7 рет шығарылғандығын, алдағы уақытта университет аталған оқулық негізінде кітап басып шығаруды жоспарлап отырғанын жеткізді.
– Ғылыми-тәжірибелік конференциялар мектеппен бірге өте бермейтіні белгілі. Университеттің мектепке келуі үлкен байланыстың жолын көрсетеді. Шәкәрім шаңырағы бүгінгі таңда облыстың барлық мектептерімен байланысын күшейтуде. 90-шы жылдары мектеп пен ЖОО-ның арасы алшақтап кетті. Іс-тәжірибеден өтетін білім алушылардың халі мүшкіл болды. Сол себепті де білікті мамандарды даярлауда біз бірлесіп қызмет атқаруға тиіспіз,– деді Бауыржан Аманкелдіұлы.
Бұл күні аталған мектепте ресми түрде қазақ филологиясы және журналистика кафедрасының филиалы ашылды. Университет ұжымы мектеп кітапханасына ғалымдардың кітаптарын табыс етті.
Интеграциялық байланыстардың нәтижесінде университет пен мектеп арасында өзара ынтымақтастық туралы меморандумға қол қойылып, интеграцияланған оқу жоспарлары, дуалды оқыту жүйесі, бірлескен білім беру бағдарламалары, ғылыми зерттеулерді және бірлескен жобаларды жүзеге асыру мәселелері талқыланды.
Конференцияда отандық ахметтанушы ғалымдар ұлт ұстазының өмір жолы мен қоғамдық-саяси қызметі жайында баяндама жасады.
Айта кетелік, Семей қаласының Шәкәрім атындағы университеті облыс мектептерімен өзара әріптестік байланысты арттыруға бағытталған кешенді жоспарын тұрақты түрде жүзеге асыруда. Оқу орны ғылым мен жоғары білім және ағарту саласының оқу-әдістемелік, ғылыми-шығармашылық байланыстарын нығайтуға арналған «ЖОО — МЕКТЕП» жобасы аясында нәтижелі жұмыстар жүргізіліп келеді.
Іс-шара соңында қонақтар Ахмет Байтұрсынұлы атындағы мектепте ашылған ерекше үлгідегі ашық музейді аралап, мектеп оқушыларының «Ұлттың ұлы ұстазы – Ахмет Байтұрсынұлы» тақырыбындағы концертін тамашалады.
Шәкәрім университетінің баспасөз қызметі
