Республика күні қарсаңында Семей қаласы тағы бір жаңа ғимаратпен толықты. 21
қазан күні Семей қаласындағы Степной кентінде 300 орынға арналған мектеп
қолданысқа берілді. Оқу ордасының ашылу салтанатына Абай облысының әкімі
Нұрлан Ұранхаев, Семей қаласының әкімі Нұрбол Нұрсағатов, облыстық білім
басқармасы басшысының міндетін атқарушы Нұржан Ахметқалиев және ата-
аналар мен оқушылар қатысты.
Енді жаңа мектеп Семей қаласындағы «№46 жалпы орта білім беретін мектебі»
коммуналдық мемлекеттік мекемесі деп аталады. Мектепте жуынатын және киім
сақтайтын бөлмелері бар кең спорт залы, 108 орынға арналған асхана, 100 орынға
арналған акт залы, зертхана кабинеттері және шеберхана бар. Оқу ордасындағы барлық 19
кабинет интерактивті және маркерлі тақтамен, теледидармен қамтылыпты. Оқушылардың
қауіпсіздігі үшін 24 ішкі және 15 сыртқы бейнекамера орнатылған. Мектеп ауласында
волейбол, баскетбол, футбол алаңдары бар.
— Құрметті оқушылар мен ата-аналар. Бүгін Сіздердің ұзақ жылдар бойы күткен
тілектеріңіз орындалып, Степной кентінде 300 орынға арналған жаңа мектеп ғимараты
есігін айқара ашып отыр. Мектепте оқушылардың сапалы білім алуына және
шығармашылықпен айналысуларына барлық жағдай жасалған. Оқу кабинеттерінің
барығы дерлік интерактивті тақтамен, теледидармен, көрнекілік құралдармен
жабдықталды. Құрметті оқушылар, жаңа мектепте жаңа биіктерді бағындырып, оқуда
озат болыңыздар. Қадамдарыңызға сәттілік тілеймін,- деді облыс әкімі Нұрлан Ұранхаев.
Физика кабинетінде оқушылардың партасына арнайы тоқ көздері тартылса, химия-
биология кабинетіндегі әр оқу партасына су құбыры және кәріз жүйесі қосылыпты.
Кітапхана әдеби-көркем шығармалармен қамтамасыз етілген. Мұнда 20 орындық оқу залы
бар. Жалпы, мектеп құрылысына 1 млрд 300 мың теңге қаржды бөлінген.
— Степной кентінің халқы жаңа мектептің ашылуын отыз жыл сарғая күтті. Сондықтан
бүгін ата-аналар мен оқушылардың қуанышында шек жоқ. Бұған дейін осы кентте
тұратын балалар қаламыздағы №№10, 11, 22, 39 және басқа да мектептерге қатынап оқып
жүрген. Мектепте сабақ екінші тоқсаннан басталады,- деді мектеп директорының міндетін
атқарушы Құралай Тайбурова.
Айта кетейік, биыл Семей қаласында жыл басынан екі мектептің құрылысы аяқталып,
қолданысқа берілді. Бұған дейін Шығыс кентінде 1200 орынға арналған жаңа мектеп
ашылған еді. Облыс әкімі Нұрлан Тельманұлы Семейде әлі 4900 орынға қажеттілік бар
екенін айтқан болатын. Алдағы үш жыл ішінде шаһарда тағы бес мектеп — Қарағайлы
шағын ауданында, Водный кентінде және басқа да аудандарда бой көтермек.
Жадыра ТӨЛЕГЕНҚЫЗЫ,
«Семей таңы»
