Абай ауданындағы Көкбай ауылында тұратын Замзебаевтар әулеті жыл сайын
дәстүрлі түрде өтетін «Мерейлі отбасы» ұлттық байқауының жеңімпаздары атанды.
Отағасы Серікбек Замзебаев қыркүйек айында 73 жасқа толды. Жұбайы Мастура
Нұғманқызымен бірге төрт бала мен он немере тәрбиелеп отыр.
27 жыл бойы кітапханада қызмет атқарып келген Мастура апай 1997 жылы отбасының
бірінші немересі Мұхтар дүниеге келгенде зейнетке шыққан. Атасы мен әжесі Мұхтардың
саналы, білімді азамат болып қалыптасуында үлкен рөл атқарды. Мұхтар –
Республикалық Абай, Шәкәрім оқуларының жеңімпазы, Көкбай оқуларының жүлдегері.
ШҚО бойынша дарынды балалар кітабына енген. Өнерлі жасөспірім ән айтып,
«Жайдарман» ойындарына да қатысады.
2005 жылы тағы бір немересі – Мағжан дүниеге келді. Ол бүгінде Назарбаев Зияткерлік
мектебінің 12-сыныбында оқиды. Жақында ғылыми жобасы үшін Қазақстан Республикасы
Оқу-ағарту министрі А.Аймағамбетовтің алғыс хатын иеленді. Домбырада ойнап, үш
тілде еркін сөйлейді.
Тағы бір немересі – 16 жасар Заңғар — Көкбай атындағы орта мектептің оқушысы.
Республикалық Абай және Шәкәрім оқуларының, Мұқағали Мақатаев атындағы
республикалық оқулардың жүлдегері, жақында өткен Республикалық Көкбай оқуларында
1-ші орынды иеленді.
Ерлі-зайыптылардың айтуынша, балалары мен немерелері – олардың басты жетістігі мен
мақтанышы. «Мерейлі отбасы» ұлттық конкурсының жеңімпазы атанып, Астананың
төрінде қошемет пен марапатқа ие болған әулет Абай облысының мерейін үстем етіп,
абыройын асқақтатты.
