Республика күні Семей қаласында кең көлемде аталып өтті. Ұлттық мереке қорытындысы ретінде кешкі концерт ұйымдастырылды.
Талшын ҚАЛИАСҚАР,
«Семей таңы»
Кешке орталық алаңда Әміре Қашаубаев атындағы филармонияның, сондай-ақ қалалық мәдениет үйінің әртістері мен шығармашылық ұжымдарының гала-концерті өтті. Сонымен қатар, Абай облысының Үржар, Бородулиха, Аягөз аудандарынан келген шығармашылық бірлестіктердің әртістері семейліктер алдында патриоттық әндер шырқады. Мерекелік кештің басты қонақтары эстрада әртістері Ерке Есмахан мен «Алашұлы» тобы өнер көрсетті.
Ерке Есмахан өзінің репертуарындағы хит әндер «Қадай?», «Kz жігіт», «1001 түн» әндерін шырқаса, «Алашұлы» тобы өздерінің рухты, намысты оята білетін «Батырлар ұраны», «Сәйгүлік», «Қазақтың баласымын», «Тұраным» әндерін орындады.
-Қазақстанның барлық қалаларында осындай концерттер өткізілді, бірақ ол тек Семейде ерекше болды. Сіздерді жаңа облыстың құрылуымен құттықтаймыз және жақсы жаңалықтар тілейміз, — деп жазды «Алашұлы» тобының әншісі Мақсат Рахмет өзінің инстаграм парақшасында.
Іс-шара соңында мерекелік от-шашу атылып, Ұлттық мереке қорытындысы ретінде Ескендір Хасанғалиевтің әні «Атамекенмен» аяқталды.
Мерекенің Еліміз үшін тарихи маңыздылығы өте зор, бұл дегеніміз ең бастысы ұрпақ тәрбиесі үшін қажет дүние. Сондықтан, Қазақ елін 13 жылдан соң қайта қауышып отырған Республика күнімен шын жүректен құттықтаймыз!