Ақтөбе облысында екі күн бұрын қоқыс полигонында табылған жаңа туған нәрестенің анасы анықталды, деп хабарлайды Stan.kz ақпарат агенттігі Zakon.kz порталына сілтеме жасап.
Ақтөбе облысының полиция департаментіне нәрестенің анасы қорыққанынан осындай әрекетке барғанын айтқан. Полицейлер қазір істі тергеп-тексеруде.
“23 қазанда Қарғалы ауданы Бадамша ауылы маңындағы Рождество-Донское тасжолының бойында орналасқан қоқыс полигонынан жаңа туған сәбидің мәйіті табылды. Жедел іздестіру шаралары барысында оның анасы 1995 жылы туған әйел екені анықталды. Әйел өлі баланы үйінде босанып, қорыққанынан, қоқыс жәшігіне апарып тастағанын айтты», – деді полиция.
Аталған факті бойынша сотқа дейінгі тергеу амалдары жүргізілуде. ҚР-ның қылмыстық кодексінің 100-бабына сәйкес «Ананың жаңа туған баланы өлтіруі» бойынша қылмыстық іс тергелуде. Өзге мәліметтер жария етуге жатпайды.
Еске салсақ, 24 қазанда Ақтөбе облысындағы қоқыс полигонында қара полиэтилен пакетке салынған жаңа туған нәресте табылған болатын.