Республика күні қарсаңында Семей қаласындағы Қарағайлы шағын ауданында бой көтерген көп қабатты тұрғын үйден 64 отбасыға пәтер кілттері табыс етілді. Сатып алу құқығынсыз жалға берілетін пәтерлерге әлеуметтік тұрғыда аз қамтылған, көп балалы отбасылар мен ата-ана қамқорлығынан айырылған жастар қол жеткізді. Пәтер кілттерін тұрғындарға Абай облысының әкімі Нұрлан Ұранхаев табыстады.
Салтанатты шарада Абай облысының әкімі жаңа пәтер иелерін қоныс тойларымен құттықтап, қаламызда биыл тағы да тұрғын үйлер салынатынын жеткізді. — Мемлекет басшысының тікелей қамқорлығымен біздің өңір өзінің даму жолына түсіп келеді. Кешенді жоспар қа- былданып, тың жобалар іске асырылатын болады. Біз тұрғын үй құрылысының қарқынын ұлғайтуды жоспарлап отыр- мыз. Облыс орталығын дамытудың бас жоспары әзірленіп жатыр. Биыл Семейде 496 415 мың шаршы метр тұрғын үй — 5166 пәтер салынады. Осылайша, кезең-кезеңімен баспа- на санын көбейтуді жоспарлап отырмыз, — деді облыс әкімі Нұрлан Ұранхаев. — Мен банк саласының қызметкерімін, көп балалы анамын. Өз кезегімді 6 жыл күттім. Алайда қаламыз облыс орталығы мәртебесін алғаннан кейін тұрғын үйлер көптеп салы- нып, кезекте тұрғандар баспанасын біз сияқты ұзақ күтпейді деп сенемін. Бүгін бізбен бірге өз шаңырақтарына ие болып жатқан жандарды құттықтаймын, өте қуаныштымын, — дейді Гүлсім Тұрарова есімді қала тұрғыны. Семей қаласының оң жағалау бөлігінде бекітілген бас жоспарға сәйкес, Қарағайлы тұрғын алабының егжей-тегжейлі жоспарлау жобасы әзірленді. Жоспар бойынша алдағы уақытта 227 тұрғын үй салынады. — Жаңа тұрғын үйдегі сатып алу құқығынсыз жалға берілетін пәтерлерді халықтың әлеуметтік осал топтары сана- тында кезекте тұрғандар алды, олардың 18–і – көп балалы отбасылар, 13-і — жетім балалар. Сондай-ақ, Тәуелсіздік күніне орай, тағы 64 отбасыға пәтер кілттерін тапсыру көзделіп отыр. Қазіргі күні қаламызда тұрғын үй кезегінде 13 265 адам тұр, — дейді Семей қаласының тұрғын үй инспекциясы бөлімінің басшысы Диана Шаяхметова. Еске сала кетейік, бүгінде қарқынды дамып келе жат- қан Қарағайлы шағын ауданы су құбыры, кәріз жүйесі, телекоммуникация, жылу және электр энергиясының магистральдық желілерімен қамтамасыз етілген. Шағын ауданда Назарбаев Зияткерлік мектебі, 320 орындық балабақша, 5600 орындық «Арена» мәдени-спорттық кешені орналасқан. Бүгінгі таңда жалпы ауданы 253,4 мың шаршы метрді құрайтын 41 үй пайдалануға берілген.
Бибі ТӨЛЕГЕНҚЫЗЫ,
«Семей таңы»
