Семейлік оқушылар Абай өңірі тарихи-мәдени мұрасының интерактивті картасын әзірледі. Олар болашақта картаны интернетсіз пайдалануға болатын сайтқа айналдырмақ.
Аталған карта арқылы саяхатшылар қасиетті өлкенің тарихи орындары туралы 3 тілде ақпарат ала алады.
Интерактивті картаны әзірлеген Семей қаласындағы физика-математика бағытындағы Назарбаев зияткерлік мектебінің 9-сынып оқушылары Мирас Айтбек пен Даниял Молдыбеков авторлық құқыққа ие болды.
«Картамыз әзірге макет түрінде жасалды. Дегенмен, саяхатшыға қажетті ақпараттың барлығын қамтыдық деп айта аламын. Неге десеңіз, Семей-Қарауыл күре жолынан бастау алатын карта маршруты Күшікбай асуынан Бөрілідегі М. Әуезов мұражай-үйі, Қасқабұлақ, Ойқұдық, Еңлік-Кебек үңгірі, Ералы жазығы, Әйгерім қыстауы, Жидебайдағы мемориалды кешенге дейінгі тарихи-мәдени орындар жайлы мол мағлұмат береді. Біздің картамыздың артықшылығы – саяхатшыға ыңғайлы болу үшін қазақ, орыс, ағылшын тілдерінде ақпараттар жүктелді. Ал, осы ақпараттарды оқымай, тыңдағысы келетіндер үшін аудио жазба енгіздік. Демек, өзіне керекті ақпаратты әртүрлі әлеуметтік желіден іздеудің қажеті жоқ. Барлығы бір жерге топтастырылған картаны пайдаланса болғаны», — дейді Мирас Айтбек.
Оқушылар болашақта карта макетін толыққанды сайтқа айналдырып, оның интернетсіз жұмыс істеуіне жағдай тудыруды мақсат етіп отыр.
