Абай облысында биыл 400-ден астам адамға жеке кәсібін ашуға грант берілді, деп хабарлайды ҚазАқпарат тілшісі.
Облыс әкімдігінің мәліметіне сүйенсек, өңірде биыл «Бастау бизнес» жобасының кәсіпкерлік негіздері курсы бойынша 2 627 адам оқуға жіберілген.
«Үміткерлерді қабылдау және оқыту тұрақты негізде жүргізіледі. Бүгінгі таңда 1 859 адам оқуды аяқтады. 406 адамға жеке кәсібін ашуға 400 АЕК мөлшерінде грант берілді. Ал жастарға 191 грант берілген», — делінген ақпаратта.
Әлеуметтік тұрғыда осал санаттағы азаматтар 215 грант алды. Еңбек ресурстарының ұтқырлығын арттыру шеңберінде 2022 жылы Абай облысына 302 қоныс аударушы мен қандастарды қабылдау квотасы бөлінді.
«Жыл басынан бері қандастар мен қоныс аударушылардан 264 отбасы квотаға енгізілді. Бөлінген квоталар бойынша жұмыстар жыл соңына дейін аяқталады», — делінген хабарламада.
