Шығыс Қазақстандық 14 жасар оқушы Жасмин Оразкенова Антальяда өткен армрестлингтен әлем чемпионатында қарсылас шақ келтірмеді, деп хабарлайды Stan.kz ақпарат агенттігі «Хабар 24» порталына сілтеме жасап.
Әлем чемпионы атанған қаршадай қыз «бұл — жаттықтырушымның еңбегі мен ата-анамның қолдауының арқасы», -дейді.
Жасмин Оразкенова – 40 келідегі салмақ арасында армреслинг бойынша әлем чемпионы.
Туған өлкесінің де, замандастарының да үлкен мақтанышы. Қаршадай ғана қызға қарап, бойындағы күш-қайратына таң қаласың. Тіпті өзі шамалас ер балаларға дес бермейді.
Чемпиоант алдында Жасминмен жиі әрі үздіксіз дайындалдық,- дейді жаттықтуршысы Ерназар Тоқтаров.
Өйткені доданың оңай болмасын білген. Жеңістің жеңіл тимесін түсінген.
“Осы әлем чемпионатына дайындық өте жоғары болды,біз оқу жаттығу жиынын өткіздік, екі айдай оның алдында негізі дайындықты тастаған жоқпыз, әрдайым осы жазғы демалыста да дайындықты үзген жоқпыз”, – дейді жаттықтырушы Ерназар Тоқтаров.
Төккен тер ақталды деген осы. 54 мемлекеттен қатысқан 1500-ден астам спортшының арасында Жасминнің бағы жанды. Қолының күшіне төтеп берер ешкім болмады.
“Әлем чемпионатынан жеңімпаз атану оңай болмады. Өте ауыр өтті. Бірақ енді бәрі артта қалды. Ары қарай да жаттығуға қатысатын боламын. Әзірге сабағыма ден қоймақшымын”, – дейді қол күресінен әлем чемпионы Жасмин Оразкенова.
Анасы болса, қызы дәл осы спорт түрінен жетістікке жетеді деп ойламапты. Бірақ барлық ынта-жігерін салып жүрген соң, бетінен қақпаған.
“Біз осы спортпен айналыса бастағанда жол ортада қалар, шаршайтын болар деп ойлаған едік. Бастапқыда би, домбыра, фортепиано үйірмелеріне барып жүрген еді. Бірақ мінеки аяқ асты қол күресіне бет бұрып кетті. Тіпті жауын-шашын, ыстық суық демей, жалықпай аптасына алты күн барып жаттығатын”, – дейді анасы Гүлнәр Күбенбаева.
Енді Жасмин босатқан сабақтарын қуып жетуге жанталасуда. Өйткені білекті бірді,білімді мыңды жығатынын жақсы біледі. Мұнымен қоса жан-жақты қыз бос уақытында тәтті-дәмді ас пысырып, әйел баласына тән әдептерін де ұмытпауға тырысады. Ал болашақта медицина саласының қызметкері болсам деген үлкен арманы бар.
