Атырау облысы әкімінің бұрынғы орынбасары Бақытгүл Хаменоваға сот үкімі шығып, 7 жылға бас бостандығынан айырылды.
Дегенмен, кәмелетке толмаған баласының болуына байланысты Бақытгүл Хаменова жазасын 3 жылдан кейін өтейді.
Сондай-ақ Хаменова «Құрмет» орденінен де айырылды. Одан бөлек, оған мемлекеттік қызметте қызмет етуге өмір бойына тыйым салынды.
Бұдан бөлек, тағы екі айыпталушы да кінәлі деп танылды. Олардың бірі — Атырау облыстық мәдениет басқармасының бұрынғы басшысы Ақылбек Рысқалиев 7 жылға, Өміртай Адамов 4,5 жылға бас бостандығынан айырылды.
Еске сала кетсек, Бақытгүл Хаменова мен өңірлік мәдениет, архивтер және құжаттама басқармасының бұрынғы басшысы Ақылбек Рысқалиевке қатысты тергеу 2021 жылдың желтоқсан айында басталған еді.
Сыбайлас жемқорлыққа қарсы қызметтің мәліметінше, олар Атырау қаласында Абай ескерткішін жасау және қою бойынша 145 млн теңге сомасына мемлекеттік сатып алу шартын жасағаны үшін адамдар тобымен алдын ала сөз байласу арқылы ЖШС басшысынан 4,5 млн теңге пара алды деген күдікке ілінген.
Ал ЖШС директоры Өміртай Адамов «пара берді» деген күдікке ілінген.
