Абай облысында дала өртін сөндіру кезінде қаза болған өрт сөндіруші Айдос Тоғызбаевтың отбасына пәтер берілді
Биыл 7 қыркүйекте Жарма ауданында дала өртін сөндіру кезінде Айдос Тоғызбаев қатты күйік жарақатын алып, қаза тапқан еді. 36 жаста болған өрт сөндірушінің артында бес баласы мен жары қалды.
12 қарашада «Фирма Азия» ЖШС өкілдері мен облыстық мәслихат депутаты Әсемхан Досқұжанов Семей қаласы «Қарағайлы» шағын ауданындағы тұрғын үйлердің бірінен марқұм Айдос Тоғызбаевтың әйелі мен балаларына 3 бөлмелі пәтердің кілтін табыстады.
Облыс әкімі Нұрлан Ұранхаев Айдос Тоғызбаевтың отбасына Мемлекет басшысының атынан ІІІ дәрежелі «Айбын» орденін табыс етті.
Сондай-ақ Төтенше жағдайлар министрлігі қаза тапқан өрт сөндірушінің 16 жастағы үлкен ұлы Көкшетаудағы Азаматтық қорғаныс академиясына түсуге ниет білдіргенін хабарлады.
Төтенше жағдайлар министрі Юрий Ильин Тоғызбаевтар отбасына пәтер сыйлаған компанияға алғысын білдірді.
