Абай облысының құтқарушылары жыл басынан бері 138 адамды аман алып қалды, деп хабарлайды ҚазАқпарат тілшісі.
Облыстық ТЖД баспасөз қызметінің мәліметіне сүйенсек, 16 қараша күні ҚР Төтенше жағдайлар вице-министрі Марат Күлдіков Абай облысына келіп, халықпен кездесті. Өңірдің су тасқынына қауіпсіздігі, орман өрттерінен қорғалуы, азаматтық қорғау қызметкерлерінің әлеуметтік қамсыздандырылу жағдайын жақсарту туралы сөз қозғалды.
Жыл басынан бері ТЖД бөлімшелері 2 800-ден астам рет түрлі жағдайларға аттанды. Соның нәтижесінде 138 адам құтқарылып, қауіп орнынан эвакуацияланды.
«Облыстағы табиғи өрттерге қатысты ахуал ерекше назар аударуды қажет етеді. Бүгінгі таңдағы негізгі міндетіміз — елді мекендер мен маңызы бар объектілерді маусымдық қауіп-қатерлерден қорғау бойынша тиімді шараларды іске асыру. Алда қыс мезгілі келе жатыр. Төтенше жағдайлардың алдын алу шараларына және халыққа көмек көрсету жағдайында жедел ден қоюға назар аударған жөн, — деді Марат Күлдіков.
Кездесуден кейін вице-министр азаматтарды жеке мәселелері бойынша қабылдады.
