Абай облысының жылу көздеріндегі көмір қоры нормативтік пайдалану қорының 119 пайызын құраса, бюджеттік ұйымдар толықтай қамтамасыз етілген.
Бұл туралы Абай облысының өңірлік коммуникациялар қызметінде өткен баспасөз мәслихатында облыстың Энергетика және тұрғын үй-коммуналдық шаруашылық басқармасының басшысы Болат Әбдіралиев мәлімдеді.
Фариза ТӘТТІМБЕТҚЫЗЫ,
«Семей таңы»
— Абай облысының орталықтандырылған жылумен жабдықтау қуаты 100 Гкал/сағ астам 4 ірі жылу көзімен және қуаты 100 Гкал/сағ кем дегенде 40 жылу көзімен қамтамасыз етіледі. Қаладағы жылумен жабдықтаудағы негізгі мәселе – Семей қаласының оң жағалауындағы жылу энергиясының тапшылығы. Бұл мәселені шешу үшін «Ғаббасов» және «Орталық» қазандықтарын қайта құру жұмыстары жүргізілуде. Жалпы, қосымша қуат сағатына 40 Гкал құрайды. Жылумен жабдықтау бойынша барлық жұмыстар уақтылы аяқталды,- деді Болат Әбдіралиев.
Келесі жылдан бастап Семей қаласының тұрғындары жазғы маусымда ыстық сумен қамтамасыз етілетін болады. Сонымен қатар қаладағы 3 қазандықты қайта құруға ЖСҚ әзірленуде. Бұл ретте жылу энергиясының өнімділігін арттыру және көптеген моральдық тұрғыдан тозған экологиялық қолайсыз қазандықтарды алмастыру мақсатында Энергетика министрлігі қалада ЖЭО-3 құрылысының құбырлы электр қыздырғышын әзірлеу туралы шешім қабылдады. Қазіргі уақытта «Самұрық-Энерго» АҚ құбырлы электрлі жылытқыш әзірлеуге техникалық тапсырма дайындауда.
Сондай-ақ, басқарма басшысының айтуынша, жылу желілерінің тозу деңгейінің жоғарылығы да жылумен қамту саласындағы ең басты мәселелердің бірі. Облыстың жылу желілерінің жалпы ұзындығы 455,2 шақырымды құраса, желілердің орташа тозу деңгейі — 63,8 пайыз. Оның ішінде Семей қаласы бойынша 315 шақырым, ал тозу деңгейі — 68 пайыз. Жылу желілеріне ұзақ уақыт бойы жөндеу жұмыстары жүргізілмегендіктен қазіргі көрсеткіш осындай.
Бүгінгі таңда Семей қаласында және Абай ауданының Қарауыл ауылында жалпы сомасы 1 331 млн теңге қаржыға жылу желілерін салуға 3 жобалық-сметалық құжаттама әзірленді. Бұдан басқа, жалпы құны 1 995 млн теңге болатын жылу желілерін (РК-1-ден Степной кенті және ЖЭО-1-ден Ұшақтар) салу бойынша жобалар іске асырылуда.
